太陽超愛閔孝琳:「想起她時會動手寫信」
二月結婚的原因很窩心

韓國天團BIGBANG嘅成員太陽同演員閔孝琳拍拖3年,今日宣布將於明年2月結婚,太陽計劃喺入伍前,就將女友孝琳娶回家,原來外表強桿嘅太陽,喺女友面前好溫柔體貼,仲被人讚佢係女友傻瓜,二人感情能夠開花結果,唔係無原因架!

by anna

經BIGBANG好兄弟GD介紹,太陽認識咗閔孝琳,2014一齊拍MV《凌晨一點》,喺2015年5月公開戀情。

嚟緊太陽就會入伍,點解會趕喺入伍前結婚,可能係因為太陽想完滿女友嘅心願:「可以的話,我想31歲時結婚」。眼厲嘅網友搵出閔孝琳早年前喺節目提到:「希望喺29歲時遇到對嘅人,同佢拍幾年拖,然後31歲結婚」,而閔孝琳出年2月5號就滿31歲喇,睇嚟男友真係有記實女朋友講嘅說話,好sweet啊!

太陽曾經講過自己係「母胎單身」,而佢第一個承認嘅女友就係大佢兩歲嘅閔孝琳,雖然佢哋三年來都試過吵架分手,但最終都能夠有好結果,「係第一個,亦係最後一個」連粉絲都好替oppa開心!

外表硬朗嘅太陽,原來內心好溫暖。太陽之前喺電視上講過:「我經常寫信俾女朋友,只要諗起佢,我就會寫一封信俾佢」,透過情信,將內心嘅愛意傳俾女友,真係好甜蜜啊!

BIGBANG成員亦向節目爆料,話太陽係女友傻瓜,因為太陽每次同閔孝琳吵架或者分手嘅時候,太陽嘅表情都好似世界要滅亡咁,難過嘅心情會寫晒喺面上,睇得出太陽好重視女朋友。

太陽今日下午喺IG發表愛的宣言:「今天,我想和大家分享一個重要及幸福的決定,我將會與一直陪伴在我左右的閔孝琳共度餘生。閔孝琳無論在我開心或不開心的時候都在我身邊、相信我,日後我將會和她組織一個家庭,和她在一起。對我而言像家人的粉絲、BIGBANG成員及YG的工作人員,真的好感謝你們。今後我會成為一個更有責任感、更謙遜的人,希望大家祝福我及閔孝琳。」

LOAD MORE