feature

編輯親試美味Burger!推介香港最好味漢堡包

編輯親試美味Burger!推介香港最好味漢堡包

90%香港人第一個接觸嘅漢堡包一定係麥當勞,大個咗先知道原來Burger可以有咁多唔同嘅餡、唔同嘅醬,咁多combination。不過,今次就同大家還原基本步,淨係講入面塊牛肉,真心,塊牛肉唔得就算最勁嘅配料,個Burger都唔會好食。

by 流心油

今次就先講5間我食過嘅burger畀大家參考下,睇完先考慮去唔去食!

1. MO bar

美食,漢堡包

MO Bar出名afternoon tea,但試下去食Lunch,個海南雞飯又幾好味,咁就有信心繼續去食。第二次食咗Traditional Beef Burger,聲稱係用上180克和牛漢堡扒,實物的確好厚呀!牛肉夠嫩,牛味係有嘅,但唔算好濃郁,肉汁又唔算好juicy,都好味嘅,不過不失喇!

推介度:★ ★ ★(5星為最高)

2. Shake Shack

美國過江龍,睇佢揀得ifc就知佢想走高檔少少嘅路線。不過,價錢嚟講佢真係唔貴,都只係5、60蚊一個包,喺ifc嚟講絕對係合理價錢,都可能係佢哋想做到嘅假象。Anyway,味道最緊要!食咗兩次,一次食Shack Burger,一次食Smoke Shack,兩次都冇失望!牛肉係用全天然安格斯牛肉,唔算好厚,但牛味濃,而且唔乾、有肉汁,依個價錢嚟講性價比都算高!

推介度:★ ★ ★★  (5星為最高)

3. Beef and Liberty

喺我仲係學生嘅時候,Beef and Liberty都曾經火紅過,但係近年就真係少咗聽到人講佢,衰咩?keep唔到個quality囉!之前食都仲覺得ok,但今年食過兩次,兩次都有啲失望。Beef and Liberty嘅特色係將牛肉表層煎到焦脆,口感嚟講係幾好嘅,但好容易過咗火,搞到舊肉好乾,肉汁嚟講近乎零,不過都算有牛味嘅。可能我兩次都唔好彩,咁啱個廚煮得唔好,但如果去食嘢係要賭一舖嘅,你仲會唔會去?

推介度:★ ★ ★ (5星為最高)

4. Lily and Bloom

作為一間美式餐廳,有Burger食係好正常,但作為一間唔算主打Burger嘅餐廳,佢嘅Burger係出乎意料嘅好味,超級驚喜!佢嘅Old Fashioned Bloom Burger,用上熟成和牛(Dry-Age Wagyu),配料有黑松露醬、煙肉。其實配咩唔重要,因為塊牛肉好味到爆!表層帶點焦香,但冇煮得過火,一咬入去牛肉勁鮮嫩,牛味濃郁而且肉汁滿瀉,juicy到爆,真係食完好想再食!不過,始終佢唔係專食Burger嘅餐廳,Keep唔keep到個quality真係要食多幾次先知,但都絕對推介大家去試下!

推介度:★ ★ ★ ★★(5星為最高)

5. The Butchers Club Burger

好多朋友讚到天上有地下冇,咁我都去試下喇!點知真係驚為天人,好似誇張咗,但真係好好味呀OMG!試咗佢哋嘅Texas Back,用上乾式熟成牛肉漢堡扒(Dry-Age Beef),烤到內脆內軟,牛味濃郁、鮮嫩、香口,勁好味;雖然肉汁未多到到爆出嚟,但味道搭夠。用上咖啡粉、辣椒等香料,令到整塊牛肉嘅味道好有層次,而且麵包好香脆,係加分位!唔難怪上到米芝蓮街頭小食榜,係實至名歸架!鍾意食Burger嘅人一定唔好錯過!

推介度:★ ★ ★ ★★  (5星為最高)

LOAD MORE