feature

女大十八變!莊錠欣Elkie愈大愈有星味,回港感動到喊

女大十八變!莊錠欣Elkie愈大愈有星味,回港感動到喊

香港童星Elkie莊錠欣於韓國出道,成為CLC女團嘅成員,又出碟又拍韓劇,成績唔錯,韓國觀眾仲好鍾意Elkie喺《富家公子》嘅演出,真係好替Elkie開心啊!20歲Elkie細細個開始就接觸演藝興趣,又學唱歌、跳舞,後來仲做埋大台童星,打造韓星夢,人仔細細已經有咁唔錯嘅成績,真係好唔容易。

by anna

早前Elkie就返嚟香港,出席「韓流舞蹈模仿大賽」嘅評審,仲喺台上表演跳舞,獲大批粉絲支持。Elkie話,今次係佢出道後首次回港,覺得:「好神奇、好開心,好似回歸返到屋企咁。」一班粉絲見到佢都好興奮啊!

大家都知Elkie係TVB童星出身,但原來佢成為童星之前,就加入過薛家燕旗下少女組合Honey Bees,細細個已經要上台表演同面對鏡頭,認真唔簡單啊。

而後來Elkie就參演過好多電視劇,例如《怒火街頭》、《公主嫁到》、《老表,你好hea》等等⋯⋯好多套作品都令人印象好深刻,正正係因為佢自然演技加上清純可愛嘅樣子,深得觀眾喜愛架。

原來Elkie想成為韓星都係因為佢嘅偶像李敏鎬:「我好鍾意少女時代,覺得她們不但只靚女,仲唱得跳得,睇佢哋表演就會充滿力量,好羨慕啊。最鍾意嘅韓劇係《繼承者們》,好鍾意李敏鎬,亦好欣賞朴信惠嘅演技。」

女大十八變係真係無講錯架,Elkie愈大愈靚女,而家仲係唔少宅男心中嘅女神。最近Elkie回歸返香港做評審,佢就話因為行程太趕,今次未夠時間去見朋友,但係都有抽時間去海傍行下。

今次返嚟香港見大家,佢覺得好神奇,後來有班參賽者大跳CLC嘅舞,佢仲感動落淚。

問到佢喺韓國有無整下野袋,佢就自爆話曾經喺宿舍親手煮港式美食俾隊友試:「試過整臘腸炒飯、蒸臘腸同埋港式公仔麵俾隊友食!」

而Elkie喺《富家公子》一劇中嘅亮眼演出,就得到唔少韓劇迷嘅喜愛。劇中Elkie就暗戀金旻奎,但金旻奎就對Elkie表示自己將係最後一次幫佢,以後就各不相干,令莊錠欣露出失望嘅表情,仲對金旻奎講:「夢夢唔想就咁結束!」唔知Elkie同金旻奎嘅感情發展最後係點呢,好期待啊!

LOAD MORE