feature

享受寧靜慢活,3間香港特色咖啡店

享受寧靜慢活,3間香港特色咖啡店

香港嘅咖啡店開到周圍都係,如果想快脆飲杯咖啡嘅 Starbucks同Pacific總有一間喺左近,但係有時想如果搵一間靚靚地又靜靜地嘅Coffee Shop,坐低飲杯咖啡做下嘢,就即刻唔知去邊好...其實都仲有好多選擇嘅,等小編今日介紹3間比你啦!


1. Halfway Coffee

呢間為位於上環嘅coffee shop喺正古董街入面,分咗新鋪同舊舖。正正就係因為佢位於古董街嘅關係,所以呢間咖啡店都不忘融入古董嘅元素,店內端上嘅熱咖啡係用中國瓷杯盛載,配合埋靚靚嘅咖啡拉花,呢種中西融合別有一番風味。千祈唔好以為啲咖啡得個樣,因為Halfway Coffee沖調嘅咖啡都相當有質素,絕對唔係你平時飲到嘅連鎖店咖啡味道,呢度嘅咖啡甜度同溫度都剛剛好,唔會太苦都唔會太澀。

閒日店內人流都唔算多,但久唔久會有遊客路經影相拍攝(可能係因為啲中國傳統瓷杯實在太吸睛),位於古董街呢個位置令到咖啡店靜中帶旺,如果想坐低用電腦做吓嘢,又想嘆杯靚咖啡,呢度絕對係首選!

呢度仲成日會有好多狗狗入黎一齊嘆咖啡一齊hea下,如果你係愛狗之人,呢度應該會係你嘅咖啡店top pick!

地址:上環東街12號地舖/上環摩羅上街26號地舖

2. La Station

旺中帶靜嘅咖啡店又點止得一間,呢間位於灣仔嘅Coffee Shop都不甘示弱。店外嘅紅色霓虹燈大招牌相當搶眼,加上店舖內時尚以車站為主題嘅室內設計,行過嘅路人都不禁望多幾眼。

La Station 其實係Paul Lafayet嘅集團營運,所以由咖啡到食物都相當有保證!講起Lafayet,當然唔少得佢最出名嘅Creme Brulee(焦糖燉蛋)啦!店內除咗有賣Creme Brulee之外,仲有一系列色香味俱主嘅蛋糕同麵包。

小編最鍾意坐嘅就係呢個面向街嘅window seat 啦,除咗打卡一流之外,望住唔係太繁忙嘅街景都不時會為我提供創作靈感架。

地址:香港灣仔皇后大道東 248 號

3. Cafelife

如果鍾意食甜點歎咖啡嘅話,呢間Coffee Shop就最適合不過。佢哋嘅甜品賣相同味道都相當吸引。咖啡店會因應季節而推出期間限定嘅甜品,呢排嘅白桃撻就係唔少人嘅favourite,味道清新得嚟唔會太甜,配埋拉花咖啡,top shot打卡超靚!

除咗期間限定嘅蛋糕之外,其他蛋糕同甜品都十分吸睛,除咗賣相吸引之外,都好好味架!如果坐低做嘢嘅時候,叫返杯咖啡加件cake都實在係唔錯。

咖啡店入面嘅裝修乾淨簡潔,坐低喺度做嘢感覺都十分舒適。店入面嘅落地玻璃可以令你望到出面熙來攘往嘅馬路,久唔久仲會見到啲狗狗係出面走嚟走去添!

 

地址:上環皇后大道中251太興中心二座B&C鋪

LOAD MORE