editing

分手二三事:3個分手細節你要知

分手二三事:3個分手細節你要知

人生流流長,除非你A0到老,或者初戀情人就係你老公,否則理論上你都一定分過手、失過戀。觀乎市面上嘅戀愛課程,幾乎清一色都係教人溝仔溝女,甚至有人開班專門為毒男傳授約會心法,收費極高昂 (伏味極濃,有冇用就唔知啦,利申冇上過)。

by AhGrass

所謂有相戀,就有可能會失戀,咁點解分手嘅技巧又好似冇乜人講嘅呢?分手嘅痛係難避免嘅,但係如果將細節處理好,其實毋須變成仇人、他朝再見亦是朋友,甚至有機會愛火重燃。或者你會問,既然都分手、我又咁慘,其實仲有咩要注意?

第一點,慎選分手時機。呢點相當緊要,千祈唔好喺人哋慶祝開心事、或者處理傷心事嘅時候分手。無非只係一句分手,何苦要揀喺人哋想分享喜悅嘅時候潑狗屎、甚至喺佢需要安慰嘅時候踩多兩腳?

第二樣點,就係分手還分手,唔好牽涉其他人。就算你靜靜雞一腳踏兩船、派綠帽都好,若然尚未俾人發現的話,求求你用心作一個好少少嘅理由分手,盡量關於你哋兩個人嘅問題就好。分手本身冇咩大不了,但人最怕係同人比較。如果情敵比自己優秀,條氣唔順自然係基本;如果情敵比自己低質,咁就仲大獲:點解條女又肥又矮、冇波冇樣,咁廢我都要輸畀佢?

第三,唔好為咗少少嘅爭執,挖返晒以前嘅嘢出嚟鬧。其實唔止分手,平時做人都應該係咁;大多數嘅鬧交,其實都係因為某啲微細嘅事情而引起,但本質上佢都曾經係一個你愛過嘅人,如果為咗一條導火線,一次過抹殺晒大家以前嘅努力、所有甜蜜回憶,其實係相當不智嘅 (咁當然都要睇情況:如果佢呃你財產、出賣家人、純粹呃蝦條、借你上位,就算你放火燒佢......腳毛,我覺得都冇問題)。

最後其實都係一句,分手都可以好來好去。分手唔一定代表你互相對立,說穿了就係曾經以為彼此可以一齊走到終點,只不過原來各自心中都憧憬住更好嘅旅途。即係最終分開,至少如果大家都為對方努力過、照料過,咁都不失為一段美好嘅旅程;今日一別,就算他日唔再並肩,起碼見面嘅時間仍然能夠問候一聲:你好嗎?

LOAD MORE