feature

第一次約會,5招零尷尬打開話題!

第一次約會,5招零尷尬打開話題!

有冇試過同男仔第一次約會尷尷尬尬唔知講咩好,又或者瘋狂deadair?其實出現呢啲情況都係好正常,話哂第一次出街會緊張同怕醜都係人之常情。如果想令尷尬情況降溫,不如睇下以下呢幾點,教你輕鬆打開話題!


1. 親切笑容

第一次約會

緊張係正常但記住要笑!!!或者你唔知,但有研究指出笑容係男仔覺得女仔其中一樣好吸引人嘅地方。笑容係免費嘅,所以下次如果唔知比咩反應又或者好緊張,不妨以一個親切嘅笑容去回應,不費吹灰之力之餘,仲可以令場面冇咁尷尬,話唔定你傻傻咁笑一笑會令對方覺得你好可愛呢~

2. 談一下旅遊

第一次約會

唔知講咩嘅時候,最容易引起共鳴又或者伸延話題嘅topic莫過於傾吓去旅行。可以講吓以往嘅旅行經歷,又可以講吓最想去邊啲旅遊勝地,再唔係問吓對方係屬於邊類旅遊人:背包型、shopping型、休閒型、定係打卡型?如果想再延伸topic都可以試吓分享旅遊照,睇吓相或者video就唔怕deadair啦!

3. 了解對方興趣嗜好

第一次約會

鍾意睇戲?煲劇?運動?定係吃貨?從對方嘅興趣,你大概可以知道佢係一個咩人,究竟係好動型定係文靜型,同自己又夾唔夾?當傾起電影同煲劇嘅時候,如果你係有睇過同一套電影/劇集固然之有嘢講,但就算你無睇過都唔使驚,咪問下對方究竟套戲/劇係講咩?好唔好睇?會唔會介紹?話唔定傾下傾下會發現一套你哋兩個都想睇但又未睇嘅戲,仲可以乘機約埋下一次去睇添~

4. 揀lunchtime/teatime

第一次約會

如果真係第一次見又唔知啱唔啱傾同會唔會尷尬,切記避免約食晚飯!!!相比起lunch同tea嘅時間,晚飯係要食耐啲。咁如果真係唔啱傾又或者好尷尬,你都要捱一個晚飯嘅時間,最少都可能要一至兩個鐘。與其苦苦咁等晚飯時間過去,不如考慮下first date約去食lunch/tea,如果真係啱傾嘅,咪可以諗吓食完呢餐之後去邊度好囉!

5. 避免問過去

第一次約會

除非對方主動提起,如果唔係過去情史呢啲私人問題都可免即免,話哂呢啲都係比較personal嘅話題。如果你主動問,對方又機會覺得你過份aggressive。第一次約會可以盡量傾返啲大家都舒服同有共鳴嘅話題,咪當係同新朋友食飯,我諗你都唔會無啦啦問人哋拍過幾多次拖,又或者點解會分手。如果之後真係有機會發展嘅,再慢慢傾到未遲啊!

其實我覺得最唔會令第一次約會尷尬緊張嘅方法:就係唔好當個次係約會!當係同friend傾計食飯,盡量做返自己,唔好掛住點impress人。又或者嗰個最自然嘅你就正正係最吸引對方之處呢!

LOAD MORE