十二星座男的回頭草指數!

十二星座男的回頭草指數!

愛情之中,有人覺得「再見不是朋友」,亦有人覺得分開過先知對方有幾重要。

By COSMO

究竟對於十二星座嘅男生嚟講,「食回頭草」嘅機會有幾高?即睇以下分析!

白羊座

白羊座永遠都鍾意向前衝,去追求新嘅刺激。雖然佢同你分手可能係出於一時衝動,就算之後有啲後悔,以佢嘅性格,他只會向前走,甚少回頭,一來佢總認為前面有更多好嘢等住他,二來食回頭草對佢來說太無面,所以佢甚少會食回頭草。

金牛座

金牛座性格比較長情,對感情忠誠,亦好執着,唔會輕易放棄。所以無論彼此之間發生咗咩問題,就算分咗手,如果佢仲發現有一絲希望,仍然會盡最後一分努力,希望可以挽回。講到底,金牛座好着重安全感,對於自己相處過又熟悉嘅人,總有一份較安全嘅感覺。

雙子座

雙子座嘅心意經常轉變,呢一刻說分手,下一刻又會話想一齊。對佢嚟講,呢個唔係食唔食回頭草嘅問題,而係好不好玩嘅問題。例如,分咗手後,發現原來你唔同咗,或者大家嘅情況變得唔同咗,對佢嚟講,就係有新鮮感,就係可吸引到他想再試。甚至有時他覺得分分合合相當好玩,試吓無妨。

巨蟹座

巨蟹座係極度念舊嘅人,基本上佢哋就係鍾意活在過去,覺得回憶總係美好嘅,所以絕對鍾意食回頭草,甚至就算已經有新對象,都仲係會對初戀情人念念不忘。如果你男友係巨蟹座,你絕對需要有心理準備,喺佢心裏面,永遠有一個角落係留給俾過去嘅情人(們),呢個係佢哋嘅本性。

獅子座

獅子座雖然愛玩愛熱鬧,但喺感情方面反而算係忠誠,所以如果情況許可,佢哋會想「返兜」。不過,亦好視乎咁樣會唔會傷害到佢嘅面子同自尊心,如果要佢又跪又氹,佢係打死都唔會做。又或者,如果外邊有更好嘅選擇,他可能會寧願去捕捉新嘅獵物。

處女座

處女座喺感情方面其實都幾實際,食唔食回頭草,都喺佢哋精密嘅計算之下。例如當佢發覺好難再搵到更合適嘅對象,食回頭草嘅回報率較高,他係絕對願意嘅。但係,如果佢知道EX根本唔適合自己,甚至同佢一齊特別蝕底,他就絕對唔會回頭啦。

天秤座

天秤座喺感情上比較拖泥帶水,所以食回頭草呢回事,根本就係家常便飯。天秤座會同舊愛維繫良好關係,奉行「再見亦是朋友」嘅政策,所以就唔係真正食回頭草,都難免容易同前度仍然保持曖昧關係。當然,不斷嘅離離合合,喺天秤身上都唔算係新鮮事。

天蠍座

一旦天蠍座真係動情,就會愛得好深,如果他係好愛一個人,得唔到係唔會甘心,所以分咗手仍然會想盡辦法去回頭。特別如果自己係被飛嘅一方,更會有種報復心態,希望將對方得到手後再主動飛咗佢。不過,如果呢段感情令佢受到好大傷害,他都可以好絕情,絕對唔會回頭。

人馬座

對於人馬座嚟講,食回頭草簡直係天方夜譚。人馬座對感情嘅態度本來就好瀟灑,唔會眷戀過去,所以如果真係分咗手,佢哋甚至可以好輕易咁忘記舊情人。況且,人馬座會覺得,世界咁大,可以探索嘅事物有咁多,有大把新鮮事等住佢哋啦。

山羊座

山羊座係一個好念舊嘅星座,而且有啲偏執,又唔鍾意改變,總是覺得一動不如一靜,始終都會覺得是舊嗰個最有親切感,唔使重新去適應,可以減少好多麻煩,所以食回頭草嘅機會都幾高。不過,山羊座好實際,如果要食回頭草嘅代價太大,他會寧願放棄。

水瓶座

水瓶座雖然看似好前衛,又鍾意向前看,但性格飄忽嘅佢,亦有可能會忽然間覺得食回頭草好好玩。表面上,佢哋好理智同灑脫,亦唔會感情用事,但既然佢行事作風同常人有異,咩都鍾意試吓,其實食回頭草對佢哋嚟講都可以係一個有趣嘅實驗。

雙魚座

雙魚座感情豐富,又多愁善感,閒來發白日夢總會回味一下過去嘅戀情。而喺感情上,雙魚座總係拖泥帶水,鍾意搞曖昧,對EX仍然有啲「感覺」絕對唔係稀奇嘅事,對佢哋嚟講,食回頭草簡直是普通之極的事。

LOAD MORE