12星座邊個最知慳識儉？

12星座性格理財

錢要點樣花係每個人嘅選擇，有人豪氣非凡，有人計住計住，亦有人精打細算。

by 占星師Jupiter

21 Jan 2019

12星座邊個又最知慳識儉呢？

第1位：金牛座

金牛座好着重物質上嘅安全感，成日覺得要累積多啲物質嘅嘢先會安心，但唔好以為金牛會因為咁而好揮霍、需要買好多嘢，反而佢會好識得衡量價值，乜嘢值得買、係咪耐用、價錢抵唔抵，都會諗得一清二楚。而佢所囤積嘅東西，分分鐘包括十幾廿年前買落嘅，用得唔好嘥。

巨蟹座係典型會計「師奶數」嗰種，即係為咗慳一蚊幾毫，都會同人講價、四周圍格價，又或死都等到大減價先買。所以巨蟹都係嗰種會成日參加團購、儲優惠券、印花嗰種人，總之有得慳、買平咗，淨係呢個過程就會好開心。不過，有時巨蟹為咗家人，都係願意付出金錢嘅。

山羊座相當精明理智，通常比較清楚自己要啲咩、乜嘢先係真係有用、有需要，而唔會亂咁花費。而買嘢之前，通常都會做吓資料搜集，睇吓一般價錢係幾多，或問吓人邊隻牌子、型號最好用之類。對於山羊座，最緊要實用。有時都會買名牌，但確保嗰樣嘢係耐用、自己會常用先買。

處女座係精明眼，而且唔鍾意浪費，加上生活係比較簡約style，認為應慳則慳，節儉都係一種美德。處女座比較着重物品嘅功能，例如買隻錶，只是用嚟睇時間，咁就唔使買啲咩奢華嘅嘢。調返轉，如果要買個濾水器，一定會精挑細選，比較各種功能同效用，如果效能好，俾多啲錢都會覺得值得。

水瓶座對於物質唔係有太大追求，所以一般都唔會要啲名貴或奢侈嘅嘢，啱用就得。不過水瓶座總會有啲好投入嘅興趣，亦願意為呢個興趣而用巨額嘅金錢。例如鍾意攝影的話，就會勁買各式器材; 又或如果最愛牛仔褲，都會願意花幾千蚊買條褲。

天蠍座喺花錢方面係比較極端，有時可以非常慳儉，咩都可以不買，又或者喺殺價時殺得好凶，但有時心血來潮，又會嚟個瘋狂血拼，所以好視乎佢嘅心情，又或視乎佢當時嘅理財需要。例如佢突然下定決心要儲蓄或還清債務，食一個麵包當一餐也可以。

天秤座天生就鍾意靚嘅嘢，大部分嘅錢都係用喺衣服飾物、鞋子手袋、化妝品、護膚品呢啲嘢上面，叫最愛shopping 嘅天秤慳啲駛實在唔容易。天秤唯一嘅好處係比較理性，起碼唔會太過份，到咗某個位就會stop自己，攞返個平衡。

雙子座充滿咗好奇心，鍾意追潮流，咩都想試，只要有新產品，雙子就會忍唔住想買，特別係電子產品，電話、電腦、或各式功能多多又特別嘅電器，雙子都忍唔住手。所以叫雙子知慳識儉都幾難，最慘係玩一陣又厭，轉頭又去買新嘢試。

白羊座係衝動一族，往往行動快過思想，所以買嘢好難經過深思熟慮，特別係當佢覺得一定要快過人，唔可以執輸的話，就更加衝動，分分鐘連嗰樣嘢係咩、有咩用都唔知，就會衝動俾錢。例如嗰啲限量版，又或限時減價嘅嘢，白羊座係無抵抗能力。

人馬座天生就係任性同慷慨（唔理有錢無錢），見到鍾意嘅嘢就想擁有，而且買一件唔夠，有時更會同一款式買幾隻色等，加上人馬座非常討厭束縛，你叫他停一停諗一諗，又或做個預算規範自己、收埋張信用咭，他會覺得痛苦萬分，所以就俾佢花吧。

雙魚座對錢根本無咩概念，你叫佢知慳識儉，佢都唔知點做好。雙魚座做事都係憑感覺，鍾意就買，亦容易受人影響，俾售貨員游說又買，見朋友推介又買，你問佢買咗幾多錢佢又答唔到你。更多時候很容易買咗返去之後，先發覺自己一早買咗個一模一樣嘅。慳錢？都係算吧啦。

獅子座係土豪嘅代表人物，要氣派要面子，又要豪氣，買嘅嘢都要係牌子嘢，又鍾意奢華嘅感覺，吃喝玩樂去旅行都要好嘢靚嘢，而且對人更係要大方同慷慨，買禮物送人都唔失禮，請人食飯最緊要夠豪有面，如果叫獅子知慳識儉，佢反而覺得咁樣係寒酸同無面。