戀愛大過天？4點測試你有沒有重色輕友！

愛情往往令人沖昏頭腦，不少朋友更加係戀愛大過天！拍拖前明明糖黐豆，拍拖後想見佢都難，莫講話係想約佢行街睇戲食飯。唔好成日有口話人啦，其實話唔定你都隨時係重色輕友嘅朋友仔，快啲睇下你有冇做過以下呢4點啦！

1.與家人朋友相處時間變少

拍拖之後經常同另一半糖黐豆，可能係每一日都要見。男朋友變成首位，朋友同家人都變成次要，更加有機會因為男朋友而拒絕朋友家人嘅約會，就係為咗見男朋友耐啲。更加嚴重係會講大話：明明同男朋友一齊，卻裝有事做或病倒。（你自己都覺得推搪朋友家人約會太多次唔好意思吧！）

2.完全沒有私人時間

未拍拖之前可能閒時都會睇書睇戲，拍拖之後就完全無咗自己一個人嘅私人時間！就算見唔到都會同對方瘋狂傳訊息，到放工返到屋企就要同男朋友講電話，每一個決定都必須要問過男朋友，幾乎係每分每秒都同要同男朋友共享。

 

3.轉換朋友圈

男朋友嘅朋友圈漸漸取代你原本嘅朋友圈。開始疏遠原來嘅朋友，而跟男友嘅朋友相處多咗。雖然跟男朋友嘅朋友變成朋友，係對了解男友有幫助，但切忌過份忽略原本嘅朋友同閨密！

 

4. 完全沒有自我

「我唔可以無咗佢！」如果你講得出呢句就一定係重色輕友無誤！開始發現自己嘅世界只剩下男朋友，做咩都男朋友行先。當男朋友唔得閒陪你或者離開公幹時，你會變得百無聊賴唔知做咩好......咁恭喜你，你絕對係重色輕友嘅代表！

 

如果你決定要當有異性無人性嘅閨密，咁小編只好祝福你同男朋友白頭到老。如果唔係到分手嘅時候，曾經俾你忽略嘅朋友仔真係未必會理你！