男友失意點安慰他？學識3大要訣成為最佳女友

男人同女人係好兩種好唔同嘅動物，女人唔開心鍾意搵人訴苦，但係男人唔同，鍾意將情緒收藏起嚟，咁作為佢另一半應該點算好？以下3個要訣，可能幫到你！

1. 一個擁抱勝千言

其實安慰有時係唔使講嘢，畀個大大嘅擁抱佢，等佢知道無論發生咩事，你都會喺佢身邊，依靠住你，都已經足夠。男生唔喜歡咩都講出口，因為好多時佢哋都唔知應該點開口，所以想安慰佢嘅話，可以攬下佢，再寫張甜到漏嘅小情信畀佢，就已經冧死佢。

2. 有些事情就不要拆穿

林宥嘉嘅《說謊》入句歌詞係「人生已經如此的艱難，有些事情就不要拆穿」。男人唔同女人，有事會想搵人傾，有啲男人真係唔鍾意講咁多，咁依個時候女仔就要識做，收起好奇心，既然佢唔想講，你就唔好問。死要打爛沙盆問到篤，幫唔到佢解決問題之餘，仲可能會覺得你煩，對你反感，所以識時務者為俊傑，沉默是金呀！

3. 陪做佢鍾意嘅事

相比批評，佢更需要嘅係陪伴，佢鍾意睇戲，陪佢！佢鍾意做運動，陪佢！佢鍾意行山，陪佢！即使嗰樣嘢你好少做甚至唔鍾意做，但你都肯陪佢做，咁樣可以畀佢知道你有幾咁緊張佢、幾咁想佢快樂。咁當然前題係嗰樣嘢係唔難做兼冇生命危險先好做喇。