坦白就係好？8個問題測你和情人坦唔坦白

有啲人要求關係裏面有絕對的坦白，不容一滴隱暪；有人覺得必要時講少少white lies無咁傷感情，經常暪嚟暪去梗係唔好，但係到底條界線應該點定呢？

想一對關係長久，你們的相處方式也很影響結果。

100% 坦白的好處

*簡單，唔使諗咁多，唔使篩選邊啲講得，邊啲唔講得。

*由於大家同意咗要100%坦白，所以即使有啲嘢坦白咗會傷感情，都係大家一齊承受同面對。

100% 坦白的壞處

*容易將坦白與私隱混淆，坦白未必代表乜都要公開晒，零私隱，例如有啲人認為坦白/無隱暪/信任=分享個人資料、過去情史、social media account/密碼、手機/電腦/電郵/提款咭密碼、存款數目，其實咁會唔會反而反映出段關係缺乏安全感？

*有啲嘢好小事，講咗只會嗌交收場又於事無補，係咪都要講？例如你阿媽同你數落佢乜乜乜，你全套覆述一次係咪就解決到問題，對你、佢、阿媽三方都有幫助？有時坦白反而係唔肯孭飛嘅擋箭牌。

對人坦白，先要對自己坦白！

喺感情關係入面，坦然面對自己先係最大課題！先諗下自己：
1. 言行係咪一致？
2. 面對有建設性嘅批評，係咪願意坦然聆聽？
3. 你應承咗嘅嘢，通常做唔做到？
4. 你值唔值得人信賴？

5. 你喺咩情況之下會講大話？
6. 你習慣「隱惡揚善」 定「揚惡隱善」？
7. 平等對你有幾重要？點解？
8. 對於自己嘅犯錯/疏忽/不足，你通常會點處理？盡力修補？逃避？否認？搵藉口？諉過於人？