佢話唔用避孕套怎麼辦?應對男友拒絶用Condom嘅8個策略

佢話唔用避孕套怎麼辦?應對男友拒絶用Condom嘅8個策略

相信唔少女生都有遇過伴侶用種種理由表示唔想用condom嘅經驗,之但係呢回事係為咗大家設想,安全至上,愛自己嘅女生要站穩立場呀!

by juju

佢話唔用,但係你又覺得要用,咁點算好?你可以咁應對。

1. 如果佢話你咁係唔愛佢...

拆解:話佢知完全唔關事(其實佢本身應該都知),成熟咁同佢講用套係為咗大家好,重申一次用套可避孕之餘,仲可以預防性疾病傳染。

2. 如果佢話你咁係唔信佢...

拆解:話佢知完全唔關事,你當然信佢,但問題唔係而家無就等如以後都無,性傳染疾病唔係出軌先會得到,一時忽略咗衛生問題,大家都有可能感染到返嚟傳俾對方。

3. 如果佢話做做下要停落嚟戴好掃興...

拆解:示範你幫佢戴都可以好好玩,唔會影響氣氛。不妨買啲唔同款式、味道、質感嘅安全套返嚟,增加趣味。

4. 如果佢話佢戴咗好無feel...

拆解:有可能係未搵啱一款佢戴得舒服、fit size嘅condom,太鬆太緊都會影響佢嘅舒適感,最好同佢一齊試多啲款式,試到啱心水為止。

5. 如果佢話佢戴咗敏感...

拆解:轉換其他質地嘅產品,市面上普遍嘅物料分為乳膠(Latex)和非乳膠,非乳膠有Polyurethane、Polyisoprene,同佢一齊揀,俾佢知道你唔係唔關心佢。過敏係健康問題,需要時預約醫生,睇下有咩建議俾你哋。

6. 如果佢話一次無問題/體外射精就得...

拆解:認真表達愛情同性愛雖然係快樂嘅事,同時都係要認真對待嘅事,有咩「意外」出咗,大家都承受唔起,又傷感情。

7. 如果佢提議你食事後丸...

拆解:指出預防唔到性疾病傳染,而且事後丸只係for應急之用,唔可以長期咁樣使用,對身體好大影響,愛一個人唔會要佢搞壞身體。

8. 如果佢點都係堅持...

拆解:如果你情理兼備咁解釋得好清楚重點,佢都係唔接受,而佢嘅理由又唔充份,你就要認真諗下佢嘅個性同成熟度,同你期望嘅有無距離。

LOAD MORE