職場生存之道！提防辦公室無聲狗

安靜有時係一個優點，但係職場上，有啲人係會利用「唔聲唔聲」作為攻擊別人嘅武器。

身邊人到底係「文靜」定係「passive aggressive」？要識分喔！

無聲狗特徵：

1. 唔出聲，唔代表佢同意：

你同佢討論一啲嘢，佢淨係煞有介事咁問咗啲問題，你講解咗，佢又無再表達自己諗法、同唔同意之類，咁你就要小心，佢只係攞咗你料、探咗你個底，但係佢自己心裏嘅底細就一啲都無向你透露。

分辨無聲狗：想純綷偷懶嘅同事通常係無心裝載嘅，佢哋唔會煞有介事咁問咁多嘢啦！

拆招：每次同佢傾嘢，都要問返佢一啲問題，俾機會佢表態、問返佢意見。

2. 唔出聲，置身事外：

有啲人你同佢一齊負責一個project，如果佢覺得自己喺呢件事上攞唔到咩著數，佢好可能會表現得闊佬懶理，亦唔會掟橋出嚟，甚至乎明明睇到一啲漏洞都唔出聲，由你去死。

分辨無聲狗：你會發現佢故意唔開會，卸晒啲嘢俾人，連佢自己份內嘢都忽然好似失咗憶咁唔知道係佢工作範圍。

拆招：不妨大方啲俾多啲credit佢，等佢無得隨時A字膊。

3. 佢有出聲，但通常都係話「無所謂」：

提防越鍾意講「無所謂」嘅人就越有所謂，佢哋成日講，其實唔係講俾其他人聽，而係講俾自己聽，因為佢哋個心真係好計較，所以要講「無所謂」嚟提醒自己。

分辨無聲狗：世界上真係有啲人係真心無所謂、好肯幫手，佢哋嘅實際行為已經係最大證明。而淨係識講「無所謂」嘅無聲狗，通常係講完就無咗影，有緊要事實搵唔到佢！

拆招：對佢哋講嘅嘢無謂咁上心，如果佢真係好唔負責任，就要每次喺佢講完「無所謂」之後，跟手俾個實質任務佢，等佢知道要對自己嘅說話負責任。