100分男友！這4件小事看似微不足道但女生都很在意

喺一段感情入面，男仔同女仔一向都係兩個星球嘅生物，緊張同著眼嘅地方都唔同。成日聽到男仔話女朋友好難捉摸，唔知佢諗咩想要啲咩。咁可能係因為你唔知女仔著眼嘅位係咩，其實好多時最微不足道嘅事先係睇得最重要嘅事。

1. 細心照顧

正常嚟講每個男朋友都會照顧女朋友，但細唔細心就係另一件事。咁點樣做到細心呢？其實好多時好微細嘅舉動已經可以顯出你嘅細心！好似行喺馬路旁嘅時候俾女朋友行入面、過馬路嘅時候幫佢注意左右來車、被旁人撞上嘅時候一手抱著女朋友、又或者提點小心地面不平。

 

2. 主動願意幫忙

當女朋友遇上困境或難題時，主動提出幫手，唔好等到女朋友叫你幫手先幫手。好多時女友同你講遇上咩問題，其實除咗係想要你對耳仔耐心聆聽之外，其實都係想試探吓你睇下你有幾緊張自己。所以千祈唔好聽到事態唔嚴重就唔提出幫手，好多時問多一句唔駛死嘅。

 

3. 記得你嘅事

記唔記得女朋友嘅嘢都係其中一樣超微不足道但女仔好在意嘅嘢。記得生日同紀念日呢啲係基本啦，講緊嘅係你會記得埋女朋友嘅經期、上堂時間表、甚至佢公司同事叫咩名，如果你連呢啲都記得即係代表你好留意佢同平時有留心聽佢講嘢。

4. 隨時關心女朋友

「做緊咩呀」「忙唔忙呀？」呢啲睇落平凡嘅問候，卻能夠令女朋友感到加倍關愛，其實穩定嘅感情就係建立喺呢啲微不足道嘅小事上面，當女朋友獲得滿滿嘅安全感時，就唔會無啦啦胡思亂想啦！