係咪唔愛我啦?男人不愛放閃的3個原因

係咪唔愛我啦?男人不愛放閃的3個原因

我相信大家身邊一定有啲不斷放閃嘅人,但係有冇發現通常都係女仔居多。成日都會見到有啲女仔嘅IG FB 全部都係男朋友,無論係post定story都好,總之同男朋友嘅合照仲多過佢自己嘅生活照。有啲女仔更加開埋情侶page去記錄生活,無間斷放閃,誓要閃盲身邊嘅人。


但係有冇諗過點解放閃嘅通常都係女仔,而男仔都比較唔鍾意放閃?呢個「男朋友唔post合照」嘅話題經常都會係討論區見到,但佢唔post你哋嘅合照放閃係咪代表佢愛你呢?我又覺得兩件事未必有關係嘅,都有其他原因導致男方唔鍾意post情侶相嘅。

1. 性格問題

要知道唔係個個人都鍾意公開私生活,有啲人就係比較低調。有啲人就係認為拍拖其實係兩個人嘅事,無必要同其他人分享,同時人哋都未必想知。如果佢喺同你一齊之前已經好少發帖,你又點解覺得佢同咗你一齊之後會突然改變呢個習慣呢?我認識一對情侶,佢哋已經一齊咗4年,4年入面雙方都從來無post過兩個人嘅合照,但係佢兩個到依家sweet到一個點。所以,放唔放閃根本同佢愛唔愛你無關,因為有啲人本身就係鍾意低調。

雖然男朋友唔post合照,但如果佢肯帶你出席朋友或者屋企人嘅聚會,其實都已經係一個肯定。所以呢,女孩子,唔好為咗post相呢啲咁小事嘈啦!就算到最後真係俾你逼到你男朋友post相,但佢都唔係出自自願,咁又有意思咩?

2. 過往慘痛經歷

或者佢曾經都係一個鍾意放閃post合照嘅人,但係因為以往嘅經歷令到佢唔敢再試。講真,喺現今呢個世代,有幾多對情侶真係可以行一輩子?甜蜜嘅時候瘋狂發合照或者會羨煞旁人,朋友都會話「你哋真係好sweet呀」、「糖黐豆咁」、「閃死人啦」.....但係分手之後望住嗰個充滿情侶合照嘅IG版面,你都唔好話唔諷刺!更痛苦嘅係你要親手刪除照片,將一張又一張回憶嘅相片從你日常生活中刪除,曾經最熟悉嘅人轉眼間連朋友都不是,變成最陌生嘅過路人。

更加煩嘅係,同身邊嘅朋友發覺你嘅社交網絡再無另一半嘅蹤影時,都會八婆上身走嚟問你或者問你身邊嘅朋友關於你嘅感情狀況。當你將感情生活公諸於世嗰一日開始,就要承受著有朝一日你哋散咗,你嘅感情生活都會變成朋友間茶餘飯後嘅話題!

3. 真的不太喜歡

呢個應該係最殘酷又最直接嘅解釋,如果男仔未認定你又點會俾個氹自己踩呀?你諗吓一post合照就返唔到轉頭,如果佢其實係同你玩玩下,或者拍散拖嘅話,梗係唔會post相放閃啦,手尾咁長。如果佢有social media 但係又唔post合照,另一方面又唔會帶你入佢嘅生活圈子,更用盡所有方法將你收埋,其實得兩個原因,一係佢為人真係十分極度低調,一係佢就唔係太鐘意你,甚至想騎牛搵馬。至於係邊個原因就要問你自己先知......

LOAD MORE