同最憎嘅人一起做嘢的日子，如何面對？

朋友有得揀，同事呢啲就無得揀喇，有啲就算傾唔埋，都可以客客氣氣，互相尊重，但係有啲人你同佢客氣都覺委屈咗自己，不過工作還工作，都要攞返個專業態度出嚟。

職場上遇到小人，點算好？

1. 諗下點解：

憎一個人係都幾消耗精力嘅事，所以要諗清楚佢係咪值得你憎，有咩充足嘅理由，例如成日怨天怨地影響其他人、篤背脊甚至跣人、慣性處處留難大家等人難做等等；有啲情況係未必關嗰個人事嘅，例如你唔鍾意佢因為佢令你諗起某啲令你唔開心嘅人。

2. 剔走啲瑣碎嘢：

例如佢係習慣抱怨、受害者上身架喇，無乜緊要事要傾就ignore佢，唔俾反應或搵藉口行開，咁就唔使接收咁多負能量。

3. 適當指出問題：

假如喺工作上佢作出唔專業嘅表現，例如散播謠言、hea做、欺壓同事、做錯嘢隱暪、性騷擾等，就要直接指出，或者同上司講，唔好因為怕佢煩而隻眼開隻眼閉，呢啲行為會影響成個團隊。

4. 唔好俾佢影響：

如果成日諗住佢幾衰幾離譜，甚至乎激氣、唔開心，咁即係你已經俾佢影響到情緒，唔值得架！唔想俾人影響心情同工作效率，首先要攞出「我唔怕你」 嘅態度，如果有工作要同佢一齊完成，將焦點集中喺件事上面，佢搞小動作，好firm咁表明你嘅處事手法同態度。

假如佢阻到工作進度，就同上司講，有啲人會覺得同老細講都無用，其實無論結果有幾多效用，都顯示出你以事論事、做事認真嘅態度，俾到人唔可以hea你嘅感覺。