落足重本!內地真人騷走遍全球

by text by SY photos from internet

一波叫「真人騷」的電視潮流將娛樂圈重新洗牌,其中內地真人騷的嘉賓名單更是閃爆。雖然以一般港人普通水平的普通話去睇內地節目,的確幾難投入,但平心而論,內地製作規模大好多。最近香港觀眾熟悉的明星都加入真人騷大製作,黎天王黎明就由北京玩到歐洲、美洲,挑戰「要贏人先要贏自己」、張智霖袁詠儀在老撾及西班牙執行夫妻任務、余文樂遠赴美國L.A.及夏威夷跟九十後的周冬雨談情;而內地電視台亦跨境到香港追拍Twins的修心之旅,到底這班明星正在參與甚麼節目?

黎明

黎天王重振聲勢,一向真性情的他最啱參加真人騷,發揮獨特的LL本色。

黎明變身可愛大叔

鍾意就鍾意,唔鍾意就唔鍾意的耿直天王黎明自演唱會首場撻Q而公開道歉以來,重振聲勢。原來早在演唱會之前,黎明已獲內地電視台江蘇衛視邀請參與一檔真人騷節目《非凡搭檔》,黎天王的搭檔是誰不重要,因他本人在節目中真的有非凡存在感,但所指的不是天王有幾型幾chok,而是他本人從天上跌落凡間,變身略帶喜感、反應慢半怕,兼患有廁所病的可愛大叔。節目是在全球各個大城市進行不同的競賽,各嘉賓一路闖關攞分,目前已播到一半,黎天王的分數暫時是倒數第四,小編好想同佢打氣:「加油呀明仔﹗」

黎明

黎明同節目中的搭檔魏晨拍住上,一齊扮管家又一齊玩跳樓機。從北京玩到洛杉磯、倫敦、阿姆斯特丹、羅馬等地。

<<延伸閱讀>>細數歷任阿MAY!重溫13個黎明經典廣告

余文樂、周冬雨相愛逆襲

相睇節目在韓國盛行過一陣子,不過最近已經沒落。想不到打入內地市場,反而做得有聲有色。由江蘇衞視打造的《我们相爱吧》第一季已請到崔始源同劉雯這對國際CP造勢,成功打響頭炮;第二季原本再打國際牌,大力撮合Runningman女神宋智孝同台灣型男陳柏霖,而且宣傳都以這對CP為主,但係……

余文樂,周冬雨

人稱樂仔的余文樂,拍《我们相爱吧》被九十後「女友」周冬雨叫六叔,硬生生老咗一截,二人並稱為宇宙CP。

<<延伸閱讀>>《我們相愛吧第二季》明星CP完全睇!

去到節目出街後,余文樂、周冬雨這對原本被眾人嫌棄兼企圖拆散的情侶檔竟然人氣急升,在微博同網上討論度大大超越前者,兩人繼北京、香港之後,遠赴美國LA及夏威夷拍攝,戀情在異地發芽開花,取得飛躍性發展。今個星期一(五月十六日)零時三十四分,余生更發微博疑似向周冬雨表白,被眼尖粉絲發現24:34這個時間點正是兩人的年齡數字,一時之間網民瘋狂圍觀點讚,截至目前惟止已撈獲接近七十萬個讚好(er…小編表示自己用多facebook一百年,應可得到這個like數)。

余文樂,周冬雨

余文樂係微博發這張backhug相,並留言表示周冬雨有十四歲的身材,跟他的十四歲智商匹配。

<<延伸閱讀>>你愛哪一對?橙汁CP VS 宇宙CP

點解呢對CP突然爆出?原因是兩位性情中人拍得夠真,而且不時互相調戲同取笑對方,例如余文樂一開始已笑周冬雨眼細,周冬雨亦不輸蝕,稱對方為叔輩,並替他取了「六叔」這個花名;相較於陳宋戀的唯美浪漫及中韓語言不同步,令人難入戲;余文樂出乎意料講得頗流利的普通話,令他與周冬雨可以有更深層次的交流及互動,匹配指數大增。

余文樂,周冬雨

雖然相差十年,但鬼馬的周冬雨經常氹得余文樂大笑,年齡差拉近咗好多。

加上一系列被內地網民稱為「男友力Max」(Max即勁的意思)行為,如開解慢熱慎言的周冬雨、單手抱周冬雨上馬、親自下廚煮飯及在微博與instsgram發文維護女方等等,節目內外均表現得十分.堅,令人相信這對CP絕對過電。

余文樂,周冬雨

平時cool爆的潮男余文樂為周冬雨着圍裙下廚。

張智霖袁詠儀冷熱之間

睇完相睇真人騷,跟住又到夫婦真人騷,Chilam同袁靚靚去年已參演咗第一季的《一路上有你》,二人毫無顧忌的互相倜侃,令觀眾有如在睇處境喜劇。今年浙江衛市再推出第二季,決定用返已成節目生招牌的Chilam同靚靚繼續進行夫妻同心的任務,今次一路足迹更延伸至西班牙﹗

袁詠儀

最新一期的節目,一向大老婆主義的袁靚靚要化身女僕幫Chilam沖涼,場面超好笑!

<<延伸閱讀>>劉嘉玲大讚CHILAM絕世好男人

記得上季,袁靚靚這個港式麻甩婦經常以誇張的面部表情及肢體動作製造笑果,而Chilam就一臉淡定,間中窒吓佢,不愧是老夫老妻。其中有一期講到袁靚靚去見男神李敏鎬時,導演問Chilam點睇老婆為小鮮肉瘋狂,Chilam即嬲嬲哋咁反問節目組幾時安排佢女神全智賢嚟,最後更一臉平淡咁話會祝福老婆。

袁詠儀,張智霖

在鏡前經常不顧形象的靚靚贏得觀眾緣,足見真人騷本質要真。

由於袁靚靚在節目中表現得實在太百無禁忌,又素顏又發癲,劈柴比男人快,更能徒手開紅酒樽,力大無窮,真到網友話只要一見佢就笑,而且睇完節目更發現已笑出腹肌。靚靚同老公張智霖呢個冷面笑匠你來我往的相處方式,令觀眾捧腹之餘,又留下點點溫馨感。

袁詠儀,張智霖

這對老夫老妻隨節目組走遍全球拍攝,經常弄出笑料,但總是溫情收尾。

<<延伸閱讀>>無敵夫妻檔!張智霖袁詠儀再拍真人騷

Twins百萬日薪去禪修

今年三月爆出Twins在香港一連三日參加內地真人騷錄影,由湖南衞視打造的明星真人騷《心路》請到二人合體完成任務去佛寺清修,據講日薪更達一百萬人仔。好姐妹阿Sa(蔡卓妍)同阿嬌(鐘欣潼)途中要經歷搭順風車、唱錢坐巴士、比賽洗碗,然後去到大嶼山寶蓮寺跟法師上堂,學學人生道理,實行修心養性。節目已拍完,但就未有公布何時播放。單睇個內容,好似冇乜娛樂性,不過在真人騷熱潮持續發酵之下,不排除觀眾會因疲於追看嘩眾取寵的內容,而決定回歸平淡,跟着Twins去靜心。

twins

Twins首次合體參加真人騷,令粉絲好期待。

<<延伸閱讀>>蛻變 蔡卓妍

LOAD MORE