倒下再起的人生!崔建邦為圓夢重返擂台

By COSMO

上年viu TV製作出香港電視史上首創的女子MMA真人騷節目《G-1 格鬥會》,一班女仔弱質纖纖但拳拳到肉,上到擂台個個一副狠樣﹐成為城中話題。今年,大台就有樣學樣,即將播出真人騷節目《我的志願》,為崔建邦(Amigo)完成夢想。



講到崔建邦,最令人印象深刻的一定是與唐詩詠的一段情,二人分分合合,而崔建邦亦被指多次背女友偷食,即使大台如何力棒他成最強司儀,他的形象始終每況愈下。18歲開始打西洋拳的他,拜拳擊總會榮譽主席徐家傑為師,試過出戰散打比賽,錄得六連勝的驕人紀錄,人稱「散打王」。



節目中,Amigo參加了《E1 World Championship 2017》,跟來自世界各地的業餘拳手較量,為了迎接即將舉行的賽事,Amigo早於上年4月開始訓練,近日他更抛下女友,雙身飛赴菲律賓,跟當地知名拳王Bernabe Concepcion進行為期近一個月的特訓。



而他打拳的故事,一切由15年前說起。「細個有打過幾場拳賽,對上一次上擂台已經係22歲,但當時自覺未夠盡力。人生好多嘢錯過咗就冇得返轉頭,我今次有機會再上擂台,我想再操練一次,打場我滿意嘅比賽,可以話完成自己一個夢想,彌補咗一個遺憾。」


正身在菲律賓受訓的Amigo,透露在當地受訓的日子非常刻苦,每朝早上5點起身,6點開始跑步練體能,然後練拳,直至太陽落山,生活規律,絕對是日出而作,日入而息,他謂:「菲律賓是亞洲區之中,拳擊水平很高的國家,我在這裡訓練了近兩星期,很辛苦,日日都要跑步,且是跑斜路,再加上平時在香港練拳有冷氣,但在菲律賓練拳沒有冷氣,體能消耗極大。」




為以最佳狀態登上擂台,Amigo由最高峰的160磅,勁減至現時的139磅,「由22歲之後,就沒有再打拳,今次重上擂台,可算是圓自己的心願」。不過在特訓過程中難免會受傷,所以對於今次參賽,Amigo的身邊人一致投反對票。「阿爸、阿媽都覺得做咩要打拳呢?搞到自己受傷,但當我同佢哋講呢個係我人生嘅夢想後,佢哋就話明白,但都會補多句『唔好打親呀』。我覺得打拳受傷係無可避免,但如果我訓練得足夠後都受傷,都不枉係一個好光榮嘅里程。」



Amigo入行十多年,他的經歷可算曲折離奇,由舞台到後台,再踏上擂台,每一步也見證着他的成長。「好多人都冇諗過會有段咁嘅旅程,做做下主持,去咗做PA(助導),做咗一年又返去做主持,做做吓又去咗做拳手,我一生都會記得呢段奇妙嘅旅程。做PA嗰陣,人情冷暖睇得最清楚,但雪中送炭嘅亦大有人在。」人生就如一場拳場,總會領先,或是落後,這一刻成功擊中對手,下一刻亦可能會被逆轉擊倒。Amigo視「神奇小子」曹星如為偶像,從對方身上學懂意志力及堅持的重要:「我最鐘意曹星如,睇過佢好多現場比賽,而佢一啲比賽後感我都好認同。佢曾經講過上擂台就預咗有重擊,而重擊唔會係一、兩下,而係無窮無盡無止境,要學嘅係被重擊後,要點樣反擊同唔倒下,呢個亦係拳擊好吸引人嘅魅力。而咁樣嘅『拳擊人生』好多人都有發生過,只係我嚟得頻密少少。」



Amigo將於1月17日假九展參加「E-1 World Championship」拳賽,以業餘拳手身份挑戰西洋拳,究竟他能否打到入決賽,還是一場就遭KO呢?就要拭目以待!


<延伸閱讀>支持領養不棄養 神級主人-黃子華

<延伸閱讀>「肌」情四射!重溫李棟旭昔日爆肌照

LOAD MORE