隨住北上大流返大陸拍劇嘅陳喬恩近年一直留喺北京工作生活，舊年酒駕事件爆出後，喬恩因為選擇喺微博道歉都引起過兩岸網民罵戰。留喺內地拍劇嘅台灣藝人處境一向尷尬，但喬恩選擇堅持落嚟，更為此放棄結婚，成家嘅機會。最近佢上內地一個訪談節目《女人30＋》同大家剖白心跡，唔鐘意小朋友，樂於獨處，享受為事業拼搏嘅過程。喬恩同大家一一解釋佢獨身嘅種種原因。其實佢比大家想象嘅要快樂得多，佢更做好準備未來要做一個有錢嘅孤寡老人。相信唔少單身女性都會從呢個訪談中揾到共鳴。
Contributor
登入 瀏覽本網站，可獲取積分換領專屬優惠
點擊查看專屬優惠
以一部「命中註定我愛你」稱霸兩岸三地，成為偶像劇一姐嘅陳喬恩，近年一直留喺大陸拍劇揾人仔，甚少返家鄉接job。可能好多人(尤其係台灣嘅網民)都會覺得，喬恩喺大陸過得太好，所以樂不思蜀。
舊年喬恩參加嘅一個訪談節目「女人30+」最近終於喺內地播出，喺短短兩集嘅節目中，佢同大家展示咗自己「北漂生活」嘅另一面。
麵包比愛情更重要
拍完「命中註定我愛你」之後，陳喬恩同好多台灣藝人一樣，注意到內地影視圈嘅機遇同發展，跟隨大流北上嚟到北京定居，工作，仲喺樓價堪比香港嘅北京買咗屬於自己嘅家。北上令佢獲得更大嘅名氣同更多嘅金錢，但同時失去嘅喺一段可以進入婚姻嘅愛情。
有選擇就會有犧牲，喬恩笑言其實自己仲未有遇到一個男人，可以愛佢愛到願意一齊走入婚姻殿堂，與其勉強自己，不如寄情於工作，揾到錢最實在。喬恩仲話試過有男生對佢表示有好感，但佢直接對對方講「你這種很煩」將人趕走。害人害己，佢都笑言呢種性格唔適合談戀愛。
陳喬恩版本嘅東方不敗，喺選角嘅時候網上一片反對聲，但喬恩用演技折服觀眾，演活咗一個因愛生恨嘅女版東方不敗。佢話邁入40歲，自己開始只選擇自己想拍嘅劇本，速食麵式嘅偶像劇已經唔再係選項，佢更想要嘅係拍有價值嘅好作品。
「錦繡緣華麗冒險」呢套劇一時成為網民熱話，喬恩嘅出色演出獲大讚，而佢同劇中男二號喬任梁係多年好友。
只可惜對方喺16年因為憂鬱症自殺身亡，年儘29歲，喬恩話好友的離去令佢深思生命嘅意義，一定要活在當下，開心就好。
做個有錢的孤寡老人
家庭生活成為世人判斷一個女人成功與否嘅最大因素，就算係女明星都逃唔過被審判嘅命運。就算你喺演藝事業上有幾成功，網絡判官們都會認為你冇家庭冇小朋友，係一個失敗嘅女人。面對呢種評論，陳喬恩啞口無言「為什麼你們要這麼在意我的私生活？」
喬恩質問網民，點解一個大齡未婚女性，話自己過得很幸福，大家都唔相信呢？事實上佢就非常享受一個人嘅感覺。好多女明星只會講自己有幾渴望家庭同小朋友，更表示只有擁有家庭人生先會圓滿，但陳喬恩老實坦白「我不喜歡小孩，我就是不喜歡，我寧願自己一個人。」
喬恩話媽媽希望佢有一個自己嘅小朋友，如果唔係以後老咗會變成一個孤寡老人，但喬恩絲毫唔驚，仲講笑話「我會是一個有錢的孤寡老人」。
相比起小朋友，喬恩更中意動物，屋企養咗貓狗同金魚，節目中佢又同北京一個阿姨去喂流浪貓，佢話自己好中意動物嘅純真。
陳喬恩見到身邊人紛紛結婚成家，佢話當時內心都有諗過要唔要做媽媽，但確實冇嗰種衝動。不過好友謝娜做咗媽媽之後，心裡面只有小朋友，的確令喬恩感到失落過。
如果按照大眾對好女孩嘅定義嚟生活，咁嗰個人就唔係陳喬恩嘞，喬恩話做人要對自己誠實啲，40歲嘅佢，係一個強大嘅女超人。獨居但唔孤獨，富有而且時刻感到幸福。
Text by NAGISA
Edited by Candy Chau
Contributor
很宅的NAGISA，鐘意睇遊記多過去旅遊，常年混跡各大論壇同社交媒體。念舊，鐘意聽老歌，睇過好多電影，最愛「這個殺手不太冷」中嘅兩句台詞：「是人生總是這麼苦，還是只有童年這麼苦？」、「人生總是如此。」
立即訂閱接收Cosmo最新潮流資訊
訂閱電子報，獲得更多資訊、體驗及禮遇