李佳芯憑《BB來了》奪視后！劇集爆紅有原因

當全世界都話要杯葛大台劇，畀人鬧得多，近年大台都開始轉型，劇集同綜藝節目都好似好睇咗，而李佳芯同黎諾懿主演嘅《BB來了》成功引嚟唔少話題。Ali李佳芯更憑劇集奪得萬千星輝頒獎典禮2018最佳女主角，揮低勁敵黃智雯。 點解套劇咁爆？因為依4個理由！

1. 意外有B


啱啱結婚冇耐，仲想享受二人世界，加上又喺事業搏殺期，意外有BB令到李佳芯同黎諾懿都不知所措，甚至係崩潰。

李佳芯一句：「你知唔知一個女仔有咗代表啲咩呀？係事業身材樣貌全部即時ALL IN呀﹗」簡單講出全世界女人嘅心聲呀！

2. 婆熄大戰

婆媳關係自古之嚟都係人類解決唔到嘅問題之一，香港地生活艱難，結婚、買樓好多時都要靠父母，李佳芯同黎諾懿知道有BB之後就喺冇得揀嘅情況下要住喺黎諾懿阿媽盧宛茵間屋。

而盧宛茵又鍾意咩都講錢，又覺得自己有湊仔經驗好巴閉，搞到做新抱嘅勁大壓力，相信唔少做咗人新抱嘅女人都會好明白，要忍住自己把火，唔鬧爆奶奶係幾咁難同痛苦！

3. 少婦變港媽？

喺劇入面李佳芯係女強人，唔係無知婦孺，不過佢生咗B之後就加入一堆「媽媽谷」，連老公黎諾懿都話冇諗過。

相信依樣嘢好多媽媽都會有共鳴，就似李佳芯Ali所講：「有跟地區有按生B月份，可以交流下生B同湊B心得，仲有定期聚會﹗」當然有咩着數同埋搵同路人吐苦水都好重要。

4. 李佳芯演技好

最後，真係要讚李佳芯嘅演技！之前覺得佢演技唔錯，又未去到超級好，但係今次真係睇到佢嘅進步。

由意外懷嘅孕到生、患上產後抑鬱症無故歇斯底里鬧老公，再到婆媳關係出現問題，佢每一個階段都做嘅情緒都做得恰到好處。

相比上年大台視后演嚟演去都係得一個樣，李㤬芯更加值得拎視后！