【達哥、Sammi最爆笑!校長、Chi-Lam最驚喜!《棟篤特工》十大客串明星逐個捉!】

子華神再拍電影,仲要係拍一部賀歲片,唔係唔call齊人馬撐場嘛?

by 二弟

子華神再拍電影,仲要係拍一部賀歲片,唔係唔call齊人馬撐場嘛?子華神本身自己已經夠好笑,今次同幾個主要角色包括佘詩曼、C君、蘇麗珊一齊笑住演戲,仲有超多明星客串,不乏重量級人物,又爆笑又驚喜每幾分鐘就有一個,正!

1)達哥

達哥

誓估唔到,最爆笑嘅串星,竟然唔係乜乜天皇巨星,而係達哥!好做唔做,做個數學老師,仲要鹹濕搞女學生,抵佢畀人糟質!之但係,達哥讀對白嘅方式語氣別樹一格,的確好好笑!

2)鄭秀文

鄭秀文

Sammi登陸子華神嘅新戲,大概估到,因為之前Sammi演唱會都有子華神做嘉賓。今次戲入面Sammi做番自己,突然發癲話自己剩係食齋,悼念果幾隻用來開鏡拜神嘅乳豬全體,睇得出Sammi好落力!

3)鄭中基

鄭中基

今次Ronald唔止客串咁簡單,前中段都有一節幾長嘅群戲,去地獄又比人折磨之餘,又粗口又有得同「暗黑林志玲」AV女優波多野結衣做戲,仲有身體接觸,子華神偏心喎!

4)吳君如

吳君如

三姑出場好正常,今勻同麥玲玲師傅、細細粒同埋欣宜一齊打麻將登場。戲中作為子華神嘅舊情人,雖然戲份好少,但一樣搶晒鏡!

5)張智霖

張智霖

咁多個串星之中,ChiLam可以話最落力瞓身演出。點解?佢全副武裝化身成為幪面超人,成身綠色咁@勇救」小妹妹,打妹妹個老豆,好大突破,堪稱《棟篤神探》之中最好笑嘅串星之一!

6)譚詠麟

譚詠麟

校長出場,的確係驚喜,話晒佢冇乜必要出來幫手宣傳嘛!戲中佢扮演一名警察,仲有唱歌環節,要佢清唱番段唔啱音嘅一段歌仔,仲要畀人話唔好聽,確係一大驚喜。

7)楊千嬅

楊千嬅

千嬅做番老本行,唔係歌手、唔係護士,而係新紮師妹方麗娟,化身成為交通警,好有集體回憶!

8)蔡少芬

蔡少芬

棟篤特工》嘅中後部分,講述子華神飾演嘅特工,中咗招要做番自己,結果要搵番佢果堆舊情人,希望佢哋原諒自己,其中一個就係蔡少芬!諗諗下,子華神同Ada合作嘅《棟篤神探》經已係2004年嘅事,當年仲因爲觀眾而改結局。真係值得回味呀!

9)苑瓊丹

苑瓊丹

上回提到搵舊情人,其中一個竟然係苑瓊丹子?唔只,同場仲有變性做埋男人嘅鄧兆尊。一次過帶比大家一啲唔係靚女嘅舊情人,大家爆笑連場鬥戲,好睇!

10)草蜢

草蜢

去到劇情尾段,佢地包咗九展做一場大龍鳳,需要一大班人一齊同心協力先救到全世界,實現子華神「世界和平」嘅願望!其中3個幫手,就係喺時裝店賣衫同拖地嘅草蜢三子,一起森巴舞!

LOAD MORE