不過首張大碟反應麻麻，安仔後來轉投電視圈，由3000蚊底薪做起，到1988年《誓不低頭》中，演男主角「謝文武」（鄭少秋飾）個仔「謝平安」就開始人氣急升，做男一之外，更被觀眾認為似張國榮，一度封「張國榮接班人」！
其實佢早於99年嘅《創世紀》演好人好到尾嘅「馬志強」就已經好搶Fo，不過戲份唔夠發揮，去到02年拍住宣萱出演《戇夫成龍》，演活傻仔角色「丁常旺」，全城都記得佢成日追住宣萱叫「老婆仔」，演出討喜又感人，令佢首奪視帝殊榮！
佢於05年添食拍《戇夫成龍》時裝版《阿旺新傳》，再演「丁常旺」，幾年間為呢個角色嘅古裝同時裝版增肥減肥，上落20幾磅，瞓身孖宣萱傻到現代，由搓「老婆餅」變成搓「老婆湯圓」，再次搓上視帝寶座！
安仔去到2014年主演懸疑劇《忠奸人》，飾演被警員吳卓羲意外導致雙腳癱瘓及家庭破碎嘅律師「高哲行」，扮晒正直嘅佢一直想復仇，滿腹陰謀，更搞到與老婆田蕊妮愛恨交纏，鬥戲場面睇到觀眾勁心寒同肉緊，令佢第三度封視帝！
「唐立言」變萬能Key
唔止演技出眾獲獎，安仔其實仲有個角色好有娛樂性，就係《與敵同行》當中嘅「唐立言」一角，於劇集後期有歇斯底里嘅表現，其中「爆Seed」發狂及將「靚媽」呂珊掉落地嘅場面，即時成為網民惡搞Key圖題材，變身「超級撒亞人」同加入李克勤嘅gif都勁好笑！
佢於《致命復活》中仲飾演被人陷害囚於荒島10年嘅企業顧問，化晒妝扮野人，又為角色激減20磅晒排骨身形，專業演出同樣令人印象難忘！
擁7000萬物業 唔留磚頭畀仔女
除咗鏡頭前嘅角色，安仔鏡頭後嘅好老公與好爸爸形象一樣好出，早年同歌手歐倩怡結婚，育有一對仔女，夫婦不時抽空聚天倫。
安仔亦主力拍劇及投資「磚頭」吸金，近年曾有傳佢手上持有總值逾7000萬嘅物業，一家生活無憂，不過佢就話唔打算將物業留畀仔女，希望佢哋自食其力，而且同囝囝講過佢哋係基督徒，所有嘢嚟自天父，走時要還畀教會。
被周勵淇爆唔食飯養生
雖然已經53歲，不過安仔外貌未見歲月痕跡，就連身形都冇走樣，難怪與林文龍兩個型佬拍住做男一仍然勁有叫座力，拍檔周勵淇近期大爆二人比佢更注重養生，拍劇時見到兩個大男人為副Body連飯都唔食，意志力驚人！
