2018年爆出嘅神劇「延禧攻略」曾經引起整個亞洲嘅追劇熱潮，如今製片人于正再次推出「皓鑭傳」，仲預告會係全世界各個視頻網站上架，聞到有神劇味嘅TVB都一早買落，準備放喺翡翠台年三十晚開播。觀眾當然有幾期待得幾期待。開播之前已經賺足觀眾眼球嘅「皓鑭傳」19號終於正式喺內地視頻網站「愛奇藝」上線，憑住神劇「延禧攻略」儲落嘅人氣同話題度，「皓鑭傳」呢套號稱以延禧原班人馬開拍嘅新劇當然好吸引，唔少網民都話，齋睇有吳謹言同聶遠演男女主角，呢套劇已經必追不可。「皓鑭傳」首集播出以後，觀眾都大嗌好睇。好評如潮，睇嚟「皓鑭傳」有望突破延禧嘅佳績。
登入 瀏覽本網站，可獲取積分換領專屬優惠
點擊查看專屬優惠
「皓鑭傳」嘅故事發生喺戰國時代，吳謹言飾演嘅李皓鑭原本係趙國御史嘅女兒，佢嘅原型係歷史上秦始皇生母。皓鑭本來同趙國公子蛟係情侶，但因為妹妹岫玉同主母嘅陷害，令佢成為奴婢，之後俾衛國商人呂不韋買落獻俾嬴異人，亦即係秦始王嬴政嘅老竇。
「皓鑭傳」延續觀眾最愛嘅快節奏故事模式，第一集皓鑭已經經歷被妹妹陷害—被老屈同人私奔—被主母丟落河—被救起之後返屋企睇住生母被殺—睇住自己妹妹嫁俾ex—被人賣去做奴隸想向ex求助時被ex狠撇—差啲被妹妹派嚟嘅人推落懸崖。直情係慘到冇朋友！
▲皓鑭差啲俾人推落懸崖，呂不韋英雄救美但皓鑭毫不領情。
▲皓鑭係庶出之女，佢妹妹同主母成日想害佢，超級惡毒。
劇透話皓鑭之後仲會遇到好多慘事，不過仲多咗個嬴異人陪喺身邊。
第一集已經咁慘，之後皓鑭身上仲會發生咩事簡直唔咁想像，不過好在皓鑭有女主角光環加身，化身打不死的小強，每次都可以死裡逃生。
而且開頭皓鑭有幾慘，後面復仇就有幾恨，相信觀眾一定睇得好解恨。
劇情發展得快，皓鑭同男主角嘅愛情故事都發展得一樣咁快，劇情去到第8集嘅時候，皓鑭已經同呂不韋有愛的抱抱，仲逼呂不韋講愛你，完全遺傳嗮魏瓔珞敢愛敢恨呢點性格。但由於以後呂不韋會送皓鑭俾嬴政老竇，可以預見之後會有一段虐心嘅故事發生。
話明係由「延禧攻略」原班人馬打造，「皓鑭傳」入面肯定會有好多延禧老面孔。最搞笑嘅係喺延禧入面成日跟喺聶遠後面，演太監李玉嘅劉恩尚，喺「皓鑭傳」入面係演宰相，呂不韋好想巴結佢，所以對佢簡直係畢恭畢敬。聶遠都有發微博話喺「皓鑭傳」裡面冇得再隨便踢宰相屁股，佢覺得好唔習慣，相當搞笑呀！
雖然「皓鑭傳」裡面少咗皇后秦嵐同嫻妃佘詩曼呢兩個人氣演員，但取而代之嘅寧靜係內地有名嘅實力派演員，佢同馬景濤主演嘅「孝莊秘史」當年亦係不輸延禧嘅一部神劇。寧靜演嘅趙國厲夫人一出場已經用強大嘅氣場震懾住各位觀眾，更俾網民讚佢一個眼神都超有戲，相信以後都會成為人氣角色之一。
相信寧靜嘅演技絕對會令厲夫人成為人氣角色。
高貴妃譚卓演嘅係安國華陽夫人，後來收養嬴異人為義子。
明玉姜梓新演醫師殷小春。
而喺男二方面，就由茅子俊取替許凱出演。
雖然茅子俊冇許凱咁小鮮肉，但佢絕對係青年演員入面演技派嘅代表之一，兼具實力同人氣，有佢演嬴異人，觀眾之後分分鐘會鐘意佢多過鐘意呂不韋。
內地演員茅子俊今年32歲，係年青演員中比較有演技嘅實力派代表之一。
「皓鑭傳」宜家風頭最勁，再加上馬上到春節，睇怕之後「皓鑭傳」嘅追劇熱潮，只會比延禧有過之而無不及啊！
立即訂閱接收Cosmo最新潮流資訊
訂閱電子報，獲得更多資訊、體驗及禮遇