▲東東被網民話表情僵硬，好似打針打多咗，不過其實都係光線問題。
前幾日東東上電台接受訪問，佢仲攞自己個樣嚟開玩笑，話自己同DJ余偉撞樣。完全唔介意俾人話佢整容呀！大家都讚佢心態好！
▲東東講笑話自己同余東撞樣，不過又有網民話佢似同魯振順撞樣多啲。
無論點，東東天生靚仔應該無人反對掛，今個月11號，佢有份演出嘅驚慄片《玩命貼圖》喺台灣上映。
相比起片中一班青春無敵嘅後生演員，以及甜美嘅女主角任容萱，大家反而更加注意到扮演死神沙利葉嘅東東。
▲任容萱風頭都搶唔過東東。
事關電影入面嘅東東造型冷峻，西裝骨骨，撐拐杖行路超慢～ 成日攞住個蘋果喺度食，眼神凌厲，非常有震懾力。一出場已經搶曬fo，好多女觀眾仲話有咁靚仔嘅死神，死都死得開心啲。
早年多數都係演青春少年嘅東東，呢幾年轉型演嘅腹黑冷酷角色一個比一個受歡迎，之前喺「蘭陵王」入面嘅宇文邕，到靚仔死神沙利葉，東東都好開心觀眾願意接受佢嘅另一面。
▲東東嘅宇文邕一樣多人like，人氣唔輸男主角。
新戲咁受歡迎，東東都話嚟緊要演多啲好角色俾大家，不過，音樂方面佢都唔會怠慢架！
3月份就到東東人生首個紅館騷，fans當然無限支持，場騷嘅門票一早就售罄啦。東東當然唔會辜負fans，落力操肌肉，成果都幾唔錯架！
▲東東已經完全進化成肌肉佬。
東東話嚟緊春節佢都會留守喺香港操練，為演唱會做準備，連蘿蔔糕都唔食啦，老婆同囡囡食年糕嘅時候，佢就喺隔嚟做掌上壓，哇，去到咁盡？
東東仲話，到時演唱會佢都會好似之前咁，叫埋囡囡上台表演，俾大家見下佢兩個可愛嘅囡囡，fans當然越嚟越期待啦！
東東囡囡咁精靈可愛，fans當然好想喺紅館睇到佢哋上台表演。
