行禮講誓詞感動落淚
Grace行禮時換上露肩婚紗配上BVLGARI鑽飾大晒貴氣，有傳佢與鄭嘉穎各自準備誓詞，於簡單而隆重的儀式上講到眼濕濕，新郎勁冧老婆：「多謝你答應嫁畀我，無論以後條路係點，我哋一齊行落去，我會照顧你一生一世！」雙方媽媽都不禁落淚，場面感人！二人步出教堂即冧爆咀嘴，Sweet到暈！
圈中兄弟姊妹親身見證
新人於圈中人緣勁好，拍劇識落一班兄弟姊妹，Grace嘅好姊妹陳嘉寶（Anjay）同賴慰玲（Winki）一早就飛到當地，而鄭嘉穎一班《鐵馬尋橋》拍檔包括唐詩詠、馬國明、黃嘉樂、林子善，加埋黃智賢、黎耀祥以及曹永廉都有到場做兄弟，婚禮前已密密搞鬼留影，見證老友結婚難掩興奮心情！
六星級度假別墅出嫁
Grace與鄭嘉穎揀中峇里六星級度假別墅BVLGARI Resort Bali舉行婚禮，有傳佢哋請來80位親友見證人生大事，別墅房價最少約6千港元，18000呎嘅新房日租更近2萬港元，外界有傳婚禮使費達百萬都有數得計！不過別墅坐落於海拔150米高的懸崖，見到無敵大海景仲有獨特設計嘅教堂同花園靚景，最重要仲有佢哋同賓客嘅笑容，相信鄭生鄭太都覺得無價！
搵表妹操刀影婚照
結婚係人生大事，當然要搵個信得過又岩心水嘅攝影師紀錄一切，據知鄭嘉穎就搵咗攝影師表妹王賢詠操刀，琴日於海邊拍下一系列靚相！