一直對戀情隻字不提嘅內地演員趙麗穎，上 年國慶突然喺微博宣佈已經同演員馮紹峰拉埋天窗，然後到今年元旦佢仲宣佈已經懷孕，靠呢兩單新聞，兩公婆主演嘅電視劇《知否知否應是綠肥紅瘦》簡直賺嗮關注度。雖然趙麗穎因為懷孕幾乎缺席嗮所有電視劇嘅宣傳活動，但靠老公馮紹峰，同演男二嘅內地網絡男神朱一龍出動為劇集造勢，再加上係兩人新婚後推出嘅第一套作品，呢套劇嘅勢頭已經夠嗮強勁。
登入 瀏覽本網站，可獲取積分換領專屬優惠
點擊查看專屬優惠
當然趙麗穎、馮紹峰同朱一龍呢三位演員都係有名嘅收視福將，有佢地坐鎮，電視劇播出之後亦穩居第二寶座，網上點擊率同樣可觀。有消息指，原本打算同期播出嘅，由吳謹言，聶遠「延禧攻略」原班人馬主演嘅《皓鑭傳》，以及章子怡接拍嘅第一套電視劇《帝王業》（又名《江山故人》）都紛紛改期避讓。夫妻檔上陣果然冇得輸。
內地有一個女演員，論樣唔係最靚，論身材唔係最fit，甚至唔係戲劇專業嘅科班出身，但佢拍嘅每部電視劇都幾乎都可以爆紅，本人亦憑住出色演技躋身一線當紅女星。佢就係有「收視女王」之稱嘅趙麗穎。
被fans愛稱為穎寶嘅趙麗穎，16年拍電影《西遊記·女兒國》時同戲中男主角馮紹峰撻著，雖然周時都會被影到出雙入對嘅畫面，但兩人一直冇正面回應。直到18年10月佢底喺微博認愛宣佈婚訊，今年元旦馮紹峰發微博公佈穎寶懷孕，閃電完成結婚生子兩件人生大事。
有人話電影「西遊記女兒國」係馮紹峰同趙麗穎嘅定情作。
趙麗穎老公馮紹峰係劇集「蘭陵王」男主角，內地一線男星。
舊年趙麗穎跳過公開戀情，直接宣佈同馮紹峰拉埋天窗，當時「官宣體」更成為人人模仿嘅熱詞。
今年元旦佢哋宣佈懷孕之餘，不忘幫電視劇做宣傳。
馮紹峰同穎寶宣佈結婚之後播出嘅第一套電視劇，就係最近熱播緊嘅《知否。知否。應是綠肥紅瘦》，呢套電視劇亦有傳都係馮紹峰同穎寶嘅定情作，喺劇集播出之前，兩人閃電公佈婚訊為劇集造勢，大家就對呢套電視劇嘅關注當然更加高。
再加上趙麗穎，馮紹峰一直係收視嘅保證，而男二號就有內地時下話題度最高男星之一嘅朱一龍，可以話呢套劇可能係香港人心中未必係最想睇嘅一套劇，但係喺大陸絕對係同時期最多人關注嘅電視劇。
舊年《延禧攻略》爆紅，緊隨延禧播放嘅電視劇《如懿傳》因為題材同延禧非常貼近，儘管如懿喺演員同劇情上都俾延禧更勝一籌，但因為延禧風頭太勁，如懿成為炮灰劇。為咗避免再發生咁嘅悲劇，原本計劃同《知否知否應是綠肥紅瘦》同時段播出嘅《帝王業》同《皓鑭傳》自覺改期退讓。
《帝王業》係內地影壇巨型章子怡進軍小熒幕嘅第一個作品，電視劇改編自同名小說，章子怡演嘅女主角王儇性格大氣，手段強硬，係一個非常適合佢演嘅角色，呢套劇亦係浙江衛視年度重頭劇。舊年11月全劇殺青，據說呢套劇原本計劃喺今年第一季度播出，但最近宣佈將會喺第二季度，即係今年5月後先會播出，唔知係咪受到知否影響。
而由《延禧攻略》原班人馬打造嘅《皓鑭傳》，有吳謹言同聶遠將再續前緣，劇中吳謹言扮演秦始皇嘅媽媽，聶遠係呂不韋，會係一個非常虐心嘅故事，憑住延禧嘅大熱，相信呢套劇嘅關注度一定唔會低。無線亦即時買咗套劇，香港電視迷都有機會睇到。本來《皓鑭傳》18年4月已經殺青，打算食住個勢喺舊年11月播出，但由於最近知否熱潮太火爆，所以不停改期，到宜家都未知幾時有得播。
《知否知否應是綠肥紅瘦》宜家喺MyTV Super都有得睇，嚟馬仲有機會上埋翡翠台，雖然趙麗穎喺香港人中人氣並唔算太高，但夫妻檔上陣火花一定唔會少，而且呢套劇播出以後收視一路高企，穩居黃金時段收視第二，（第一通常係央視劇集），所以絕對係今年第一套必睇電視劇。
立即訂閱接收Cosmo最新潮流資訊
訂閱電子報，獲得更多資訊、體驗及禮遇