editing

識揀梗係揀黃德斌!黃德斌係最正大叔嘅4大理由

識揀梗係揀黃德斌!黃德斌係最正大叔嘅4大理由

電影《逆流大叔》令大家重捨睇港產片嘅趣味,當中潘燦良嘅演技最受讚賞、吳鎮宇就被網民捧話出年要拎影帝。其實套戲仲有一個大叔架,佢就係黃德斌,討論度好似唔及潘燦良同吳鎮宇,不過要喺三個大叔入面揀一個嘅話,黃德斌一定係首選呀!

by 方丈

1. Keep得好

唔講唔知,原來黃德斌已經55歲喇!一啲都唔似過咗半百,外貌頂多似40,身形都仲係鋼條型。雖然話揀得大叔就唔介意父女戀,更加唔介意年齡,但keep得好,拉近啲外表年紀上嘅距離,點都好啲嘅!

2. 肌男

點解Keep得咁好?因為佢Keep住運動架!喺仲未興練肌肉嘅年代,佢已經練到周身肌肉,可以話係第一代嘅肌男呀!喺拍《逆流大叔》為咗配合大叔嘅形象,佢加咗個假肚腩,佢成世都未試過有肚腩,所以喺試造型嘅時候都講咗句:「原來有肚腩係咁架!」

3. 專一

入行咁多年,黃德斌都甚少有緋聞,因為佢同圈外女友黃美恩(Joyce)至今已經拍咗17年拖,女友經營服裝店,佢就經常畀人影、畀人撞到幫女友搬貨、入貨,又會一齊去做運動,咁專一又任勞又怨,依啲男人邊度搵呀!

4. 演技

做演員唔係演技好就得,特別係大台依啲咁嘅公司,唔擦鞋、唔造新聞嘅黃德斌喺大台好多年都好少演到男主角、或者好大發揮嘅角色,不過有實力嘅點都係有實力嘅,佢喺2006年憑劇集《火舞黃沙》拎《萬千星輝頒獎典禮》攞咗最佳男配角,而佢主演嘅《天與地》咁多年都被捧為神劇。

LOAD MORE