於前作由頭好到尾嘅佢今次一開波就演野心大又無良嘅商場戰狼，與實力派林文龍鬥戲！
安仔近期更跟上潮流，自比角色「賀天生」似《延禧攻略》嘅魏瓔珞，見佢預告片已經爆金句：「呢個世界無聖人，個個都係罪人，包括我跟你注定都要落地獄！」配上奸到出汁嘅笑容，睇嚟演技又再大爆發。
離巢一線女星現真身 卡士新鮮
除咗兩大男主角，《再創世紀》嘅女主角都好有叫座力，劇集係楊怡離巢報首部擔正嘅無綫劇。
另外仲係鍾嘉欣產後復出第一擊，劇組為咗遷就嘉欣BB，仲特登畀佢於溫哥華邊拍邊湊B，同劇仲有楊怡家姐楊卓娜有份演，未知兩姊妹會唔會同場？
劇集同時係周勵淇告別無綫嘅作品，李婉華同陳少邦就分前隔24年同6年回巢無綫，加埋朗周柏豪同袁偉豪繼《使徒行者2》後再合作，仲有實力派胡楓、林嘉華、郭少芸、人氣王湯洛雯同丁子朗等，配搭都幾新鮮！
講「雷曼事件」 仲有新鐵三角
到個故仔喇！今次唔係搞地產起「無煙城」，而係主打金融風暴中，與唔少香港人好切身嘅「雷曼事件」，唯利是圖嘅賀天生（郭晉安飾）趁亂想吞併香港首富方松蔭（胡楓飾）嘅集團，最後遭富商卓啟堂（潘志文飾）阻止，懷恨在心嘅佢仲喺十年後趁啟堂心臟病發昏迷而出手復仇，啟堂細女卓定垚（周勵淇飾）於私募基金經理人高哲（林文龍飾）幫手之下守家業！
隨著啟堂甦醒，天生老婆明晞（楊怡飾）、松蔭孫仔方澤雨（袁偉豪飾）以及創業青年程凱（周柏豪飾）紛紛加入戰局！
馬志強、葉榮添、許文彪呢個「三劍俠」組合就無咗喇，不過《再創世紀》就有周柏豪、袁偉豪同鄧佩儀組成「新鐵三角」，講到佢哋擺街檔，創業以及搞眾籌，貼近潮流，不過友情戀情就備受考驗，預告已經有三人嘈到面紅耳熱嘅場面！
揼本1億港元大製作 真係有外景
今時今日連年度盛事港姐都係去澳門拍外景，《再創世紀》由中港合拍，重本到豪擲約1億港元製作費。
劇組遠赴布拉格與溫哥華等地全實景拍攝，可以見到周勵淇於布拉格街頭起舞，與袁偉豪談情，場面好浪漫！
講起睇景，《再創世紀》係由人氣劇《不懂撒嬌的女人》監製關樹明製作，之前嘅4K全實景拍攝已經令唔少網民另眼相看，大讚畫面風格，相信《再創世紀》嘅外景都唔輸蝕！
一拖再拖 遲足成個月曝光
劇集係無綫重頭劇，原定今年7月30日晚上9點半開播，不過因內地平台播映嘅審批問題，無綫先後改播《冒險王衛斯理之無名髮》同《特技人》，最後安排到9月10日先出街！
