黃子華落實7月開棟篤笑 準備好大叫「除褲、回水」

聽到子華神開騷,勸大家都咪開心得太早!因為每個好消息都會伴隨一個「不過」。黃子華繼2014年「唔黐線 唔正常」之後,相隔三年後再有棟篤笑新搞作,個個都話要入場支持,「不過」想買飛又邊有咁易。子華今次賣飛絕有可能再創秒殺神話!

By COSMO

未正式公布已現搶飛潮

子華Facebook官方網站剛正式宣布棟篤笑舉行時間,日期定為7月6日至22日,開17場,入場費最平$280, 最貴$880。票價都係其次,今次亮點反而係子華講到明「不設巡迴 香港玩晒!」。其實上星期已經盛傳子華會再開騷,全城掀起搶飛潮,為免有人乘機打劫抽水,子華Facebook都急急開post澄清子華本部非官方授權售票網站,阻止人透過其網站賣假飛,以正視聽。喺呢度再借子華神金句寄語不法人士「若要人不知,唔好太低B」。

網民提議實名登記買飛

其實有關購票信息,目前只得一個,根據子華Facebook顯示, 某銀行信用卡用戶會享有優先訂票機會,最早3月26日已經可以買飛。而家先入紙申請信用卡?等得佢批,飛都可能賣完啦!再等公開售票?到時就算肯排通宵、捱眼瞓,都未必搶得贏班黃牛黨。 難怪有唔少網民都提議子華今次採用實名登記售票方式,希望男神會認真慮,又或者加開場次滿足觀眾要求,可能來得更實際。

賀歲片票房報捷食住個勢

子華當旺,一向有「票房毒藥」之稱嘅佢同佘詩曼所主演嘅賀歲片本地票房直迫$4000萬,總算一雪前恥。票房報捷加上未開騷反應已經咁熱烈,場場爆滿應該都係預料中事,相信子華今個狗年一定賺到笑!男神呀男神,到時唔除褲都得,回返少少水比大家好嗎?

LOAD MORE