不能跌的Nude Bra！

夏日炎炎，女生想露肩、露背又唔露bra帶，可能會諗到近年流行嘅nude bra，佢而家甚至乎成為咗唔少新娘子嘅恩物之一。心思思想試下，入手前最好了解多啲，等自己唔好揀錯、用錯，同知道點keep 好啲、用耐啲！

揀啱Size

- Nude bra因為無帶無圍，所以唔似胸圍咁要度多啲嘢，最主要係揀返你平時著嘅cup size就ok (以著薄身、無墊嘅bra為準)。

- Nude bra嘅設計原意並唔係要包住哂成個乳房，所以唔好覺得包唔哂就唔啱size，關鍵都係喺個cup size度，最好跟返嗰個牌子提供嘅size chart去揀。

好好保養

Nude bra同普通bra一樣，都有個使用嘅壽命，想襟用啲，就要keep 好啲。

- 每次戴完，用暖水同溫和嘅番梘水清潔，如果唔係啲油分、皮屑等會影響個bra嘅黏貼力。洗時用手掌去捽，可減少指甲整花個bra嘅機會，用暖水沖乾淨，揈走多餘水分，等佢自然晾乾。唔好用毛巾抹，咁會好易黐哂啲毛上去。仲有，唔好放入洗衣機洗！

- 乾淨嘅nude bra最好放返喺原本個盒度儲存冚返蓋，既可防塵，又唔怕俾其他衣物壓壞。

如果無心機去保養，個nude bra買咗返嚟好可能用得一兩次就放埋一邊封塵。

佩戴小貼士

- 購買時留意產品使用嘅物料，一般嚟講nude bra用嘅都係Silicone（矽氧樹脂）。如果對物料有敏感，就要停止使用。

- 戴之前要make sure胸部皮膚夠乾爽，否則好易黐唔實，發生大事件── 跌bra！用之前唔好搽lotion、cream、閃粉等等。

- 如果本身好易出汗，戴落可能會影響個bra嘅黏貼力。

- 有人建議乳頭多分泌嘅朋友貼咗乳貼先戴nude bra，如果係咁就要睇返個乳貼嘅質哋會唔會影響個bra嘅黏貼力。

**如果你有任何關於Sex嘅問題，都歡迎email到editorial@cosmogirl.com.hk (subject: Miss Sex)，等Miss Sex為你解答。