貓咪肉球棉花糖

24 May 2015

5月初係日本黃金週，全日本嘅上班族都會放一個星期假，Kiddyland大阪梅田店內的neko mart亦都乘勢舉行黃金喵喵節，吸引一班貓奴顧客敗家。

喵喵節舉行期間，店裡會有限定甜品發售，最叫愛貓人士瘋狂嘅一定係肉球棉花糖（540日圓），由知名棉花糖專門店Yawahada製作嘅肉球棉花糖以白色為貓掌，味道係雲呢拿，粉紅色嘅肉球部份係士多啤梨同紅桑子，柔軟香甜，同貓嘅肉球一樣令人愛不釋手，十分有療癒效果！另外仲有個「三色貓box set」（640日圓），即係有齊白貓（雲呢拿味）、黃貓（紅茶味）同啡貓（朱古力），屋企有養三色貓女嘅必買！

由知名棉花糖專門店Yawahada製作嘅肉球棉花糖以白色為貓掌

其他注目甜品包括café cat棉花糖（860日圓），就咁睇以為係普通貓樣公仔，但咦點解貓頭同貓手分開嘅？點解嘅點解嘅（下刪一百句點解嘅）。原來係沖紅茶、咖啡、豆漿飲嘅時候放上去，棉花糖會浮係飲品表面，好似貓貓趴喺度偷望咁，可愛到暈。由於棉花糖本身都甜，所以夾啲冇咁甜嘅野飲就啱曬。以後唔洗去飲咖啡拉花，都可以自製貓貓飲品。

此外店內仲有貓手食物鉗（1050日圓），啱曬母親節送俾鐘意貓又鍾意煮野食嘅媽咪。

大阪梅田店內的neko mart限定甜品發售肉球棉花糖