必讀！R加人工之道

商業社會冷酷無情得令人心碎，哪管你為份工揮盡無數血汗，犧牲個人生活，老闆都唔覺得要對你有咩表示，尤其是自由巿場掛帥的香港，真的有幾多個良心僱主自動自覺加人工？唔減你人工，唔做死你，彷彿已是皇恩浩蕩。

筆者對被壓詐的基層勞工深感同情，如此消耗體力的工作理應有相當的報酬以作補償。另一邊廂，舒舒服服返寫字樓工的你和我，亦最好醒醒定定，對老闆喊一殼眼水求加薪，等如對一個已變心的男人一哭二鬧三上吊，不僅難以喚醒對方良心，反令他暗自對你扣分，對你避之則吉。

其實老闆與僱主思維之別，有如火星人和地球人咁遠，所以要求加薪之前，最好諗定有無以下條件，或者深思熟慮一點，鋪好條路先好行動。

你是無可取替：

揼石仔，好多人都識；唔做實務但識狂吹水，亦有大把人懂。但兩者兼備的人卻是萬中無一。你毋須是最鞠躬盡瘁那位，但必須是擁有其他同事所無的絕活或人際網絡，或任何任務都能派你上場，才能保住地位，令老闆好驚無咗你。

你薪酬遠遠比不上巿價：

你還要research清楚，假如老闆的競爭對手要請你這等級數的人馬，出手會否比現任公司闊綽。老闆做決定唔係憑良心，而係睇數字，如果競爭對手挖你角，會令老闆失勢，便自然能說服他將你的薪金與巿價睇齊。

公司失去你會少賺錢：

其實加唔加人工，nothing personal，it’s just business。你為老闆帶來生意和盈利增長，你的人工對他來說便是投資，加重注碼何樂而不為？但假如你的付出與老闆盈利的關係不那麼密切，甚至失去你，請個勤快新人替補仲平靚正，那麼，你的人工對他來說只是成本，有得唔加就唔加。

老闆真的有盈餘：

你勁到識飛也好，老闆自己無乜錢賺，你唔識趣要求佢加人工，佢都愛莫能助，尤其是剛起步的公司，未建功績先領獎償？開玩笑吧。要不你冒險跟他一拼打江山，要不你也可以在商言商，另謀高就。

其實為自己鋪好事業路，牽動老闆利益，唔使開口，好多老闆都會自動加俾你。溫馨小提示：打工仔不應事事向錢看，假如份工福利好，做得開心有衝勁，同事關係融洽，有時比多嗰幾百一千來得更有價值，太計較反而跟自己過意唔去。