單身人士的快樂情人節

親愛的單身人士，冇情人未必係你嘅錯，冇情人陪你過節更加唔係咩嘢糗事，因為情人節經年累月商品化，發展至今已跟「韓國食品節」、「XX感謝日」等特賣日無異。睇穿呢套浪漫經濟理論之餘，單身的你想高高興興度過214，還可選擇慶祝情人節的另一版本Quirkyalone day（台譯：樂單節）。

Quirkyalone（樂單族）的生活態度很是有型：一班享受單身生活也不排斥與人交往，但寧缺勿濫、不會為拍拖而拍拖的人；而Quirkyalone day就係「型版情人節」，慶祝浪漫、自由及獨立個性嘅日子，同樣是2月14日，樂單節不提倡俗套嘅紅玫瑰、朱古力等行貨，而慶祝主題亦比情人節更廣泛，不局限於愛情，還包括親情、友情、自愛、無私大愛等等。

並非對抗情人節，唔係同情單身人士，更唔係排斥情侶，樂單節旨在提醒大家喺尋找別人嘅寵愛之前，「自己」必先寵自己，發展一個自己喜歡又獨特嘅個性，而唔係只顧擔心自己呢世有冇人要，又或演繹情人喜歡嘅一類女生。
人若以臉書上的relationship status來定義自己不是有點兒狹窄嗎？把情人當作身份象徵又是否過於膚淺呢？趁214的來臨，放下「人有我有」嘅心理包袱，去除單身疑慮，放縱地寵愛自己吧！以下一些貼士，或許畀到大家少許頭緒。

1. 放鬆身體，享受一個full set水療及按摩。
   
2. 懶得就懶，平日工作忙碌，今天可以懶洋洋攤喺床上嘆住茶睇書、食住薯片睇戲，唔駛減肥── 一日咁多！
3. 私密誘惑，送自己一套性感內衣或性玩具。
   
4. 遊山玩水，到一個從未去過的地方探索一下。
5. 「家」點新意，調動家具位置，又或添置一件一直想買卻未有時間或捨不得買的家品。
6. 自我挑戰，做一件一直感興趣卻冇膽做嘅冒險事兒，如玩滑翔傘、攀石、拳擊等。
7. 發揮創意，相約朋友一齊參加art jamming、皮革製作班、銀器工作坊等，有嘢學、有得玩仲有自家製品作紀念，好抵。
8. 關心摯愛，送窩心禮物畀你至愛嘅家人、朋友、同事、波友等；可以的話，送埋畀你嘅仇家，可能係前度男友、公司小人……懂得寬恕會令人嘅個性更加完美！
9. 分享大愛，參加慈善團體舉行嘅義工服務，又或將舊雜誌、多餘嘅家電等「禮物」送畀撿紙皮嘅老街坊或有需要人士。唔怕羞嘅話，當日隨身帶備朱古力，送給隨時啟迪你生活靈感嘅陌生路人，施與受同樣開心。
   
10. 單身派對，相約單身嘅朋友一齊唱K或搞派對交換禮物，友情帶畀你歡樂絕不比愛情遜色。