太陽星座冷知識

坊間關於十二星座的文章相當多，大多話你知十二星座性格如何，加一兩句煽情字句，例如「雙魚座的你總是感情豐富，凡事先為別人著想，這樣實在是苦了你喔」，有邊個唔會爭住認先？今次就同大家分享一下關於星座的小知識，認識多少少關於占星學，唔好睇完乜都爭住認或者爭住自我質疑啦！

太陽星座、月亮星座、上昇星座

聽到都覺得一頭霧水？煩？其實唔難。大家出世果一日，例如你出世果日係八月廿二，咁你太陽星座就係獅子座，大家一直以來所講的「星座」正正就是太陽星座。以最入門級來說：

- 太陽星座象徵大家的人生目標同埋方向，做乜野會感覺到自己存在，覺得自己重要；

- 月亮星座是我們每一日生活的方式、點樣得到內心安全感

- 上昇星座就係我們的人格面具，我們想於別人面前呈現一個點樣的自己。

點樣先知自己月亮同上昇星座？如果你知自己出生時間，只要上網search「占星命盤」，大把網頁幫到你。

有關年度運程書

仍然心諗「我知咁詳細做乜」？如果每年星座運程書出街之後，你都會去書局打書釘望自己年度運程的話，我諗你都係搞清楚自己上昇星座係乜先比較好。我地通常都會特別多某星座的朋友，呢班朋友唔通年年運程都一樣？（當然，我亦都見過某幾個真係有一兩年發生的事好相似）金牛座的你，除左睇金牛座果本運程書，最緊要係望望自己上昇星座的運程，其實會比較貼近你，呢樣係同各位作者所用的方法有關；又當然，最適合你就一定係搵專業占星師幫你睇啦！

出生時間與性格

就算你唔知自己準確出生時間，只係知道大概，都可以估到你性格有可能有乜野傾向：以香港時間為例，日出後的上午出世的人，會傾向關心大眾比較多；正午出世的，事業心會相當強；正午後日落前出世的，著眼點很有可能會放於人際關係上，尤其於日落時間出世的人；日落後午夜前出世的，會比較著重日常生活和自己的興趣；於午夜時份左右出生的，有機會相當重視家庭；最後，午夜後日出前出生的，則有機會比較強調自我。又再當然，呢堆都只係參考方法，實際情況永遠因人而異啦（又再再當然，最貼近自己，一定係搵專業占星師剖析占星命盤啦）！

太陽星座與廿四節氣

最後，講多野關於太陽星座的有趣事，大家知唔知，其實每個星座開始的第一日，一定會係中國廿四節氣的其中一個？例如最近炎炎夏日，獅子座的第一日正正就係大暑！亦有聽講古代農民會於天秤座時候收割農作物，「天秤」正正係農作物交易時的象徵。