彭秀慧：別只猜度別人，喜歡就告白吧！

Hi 彭秀慧,

我今年22歲，個男仔就今年23歲。

上年11月頭我哋喺網上面認識，初頭大家都有好多共同話題傾，我知道佢想追我，但我覺得要先見幾次面，了解對方多啲先作決定，所以我哋12月開始見過兩次面。

但唔知點解之後慢慢我哋好似變得冷淡咗，我有試過同佢講啲佢鍾意嘅嘢，但係佢都好似無咩興趣咁，前幾日本身佢想再約我出街，我已經同佢講OK，但係佢又唔confirm我個時間，咁其實既然佢無興趣同我講嘢，點解佢仲日日WhatsApp我？我應唔應該開始唔應佢機？定應該繼續同佢講嘢？我又應唔應該再主動問佢出唔出街？我點樣先俾佢知道我其實都對佢有好感？（除咗直接表白之外）

婷

Hello 婷,

22歲，大個女了，讀過你的信，知你心中有很多疑惑和不解，同樣我也有：

1）點解你覺得兩個人有好多話題就代表對方想追你？佢有親口表示？

2)  好，即使佢初步有意思，但見過你之後變得冷淡，會唔會係覺得你唔適合？覺得你唔適合係咪錯？

3) 但你繼續對佢投其所好（即使佢好似無咩興趣），即係你選擇去付出，去培養關係，點解又要嫌三嫌四嫌佢無反應？佢無反應係咪錯？唔通佢借咗你錢？或者欺騙咗你某啲嘢？

4) 佢同你約會，但態度吊兒郎當，呢個男仔嘅性格你依然覺得OK?

5) 既然佢日日WhatsApp你，點樣係無興趣同你講嘢？你會唔會諗得太多？

總結：

你對佢有好感，但對方又無咩行動，又好似對你無特別興趣，WhatsApp一兩句令你心淡，但你自己又唔想直接表白，咁你想點？咁你想點？咁你想點？

建議：

1) 如果你可以，唔好理佢，世界好大，你可以喺網上識佢，都可以喺網上識第二個。

2) 多作正常社交活動，和不同人接觸，做普通朋友，多了解人與人之間的正常互動，或者可以找到合適的對象。

3) 做人方面，不要只猜度別人，也不要把自己抬得過高，喜歡別人而讓對方知道，也不是甚麼壞事，當然結果也不能保證，世界是平等的。

祝　早日找到合適的對象 ;)

彭秀慧

彭秀慧

編劇、舞台創作演員、導演，做劇場，做創作，最想做自己。愛劇場，愛創作，有時卻不愛自己。