朋友歡聚，攜唔攜眷的情與義！

有啲朋友自從同某某愛情關係穩定咗落嚟之後，出席朋友聚會就開始出現一個疑問，就係幾時應該帶埋另一半出席？幾時應該單刀赴約？為咗唔想另一半或朋友們尷尬，不妨參考呢啲守則去決定攜唔攜眷！

一定帶得嘅情況：

1. 參與聚會嘅朋友有主動邀請埋你另一半，就如喜帖上寫住「闔府統請」一樣。

2. 個聚會嘅性質係兩或幾pair人一齊去玩。

3. 你另一半本來同出席聚會嘅朋友就係friend，仲要係真friend嗰啲，本身唔使問都實預埋佢。

唔建議帶嘅情況：

1. 全女班／全男班老死嘅固定聚會，例如成班一齊打波打咗十幾年嘅波友，每月約埋打波或吹水嘅男人嘅浪漫聚會；或一班女生圍埋講八卦、講扮靚、講愛情煩惱嘅girl's night，都唔建議攜眷出席。

2. 有朋友提出過唔好攜眷出席，佢哋未必會好直接咁講，但可能會用「不如我哋成班女仔去食韓燒囉」、「咁難得見面，我梗係唔會帶埋我男友啦」呢啲說話嚟明示、暗示。

3. 如果明知啲friend同自己另一半玩唔埋、無乜話題就唔好勉強。

4. 同朋友嘅見面帶有工作性質，唔係淨係出嚟吃喝玩樂，如果個project同你另一半冇乜關係，就無謂一齊傾，以免影響討論氣氛。

CG! Tips：如果唔肯定帶唔帶另一半好，不妨坦白問下啲fd，如果有人表示覺得唔係咁好，亦唔好心裏有芥蒂，有時伴侶同自己各有各嘅社交生活都係好事；亦唔使要另一半從此缺席你啲朋友聚會，可以有時一齊去，有時自己去，最主要係睇場合，如果事先知道有friend有心事要傾，就要識做唔好帶另一半喇。如果你一次半次唔帶埋另一半就會無晒心機同朋友hang out，不妨諗下點解會咁嘅呢？