夏天咁熱就梗係要食雪糕啦，但要知道，女生們食雪糕係有quota架，當然要揀最好嘅嚟食啦！所以今次我哋就去咗9間大熱嘅雪糕、雪條店，試食佢哋嘅招牌雪糕同雪條，而家就即刻睇下邊間最值得去啦！
01. Gum "jeng" X 御前上茶
嚟自高雄嘅御前上茶喺今個夏天同Gum ''jeng''合作，將台灣嘅甜品帶到嚟香港！當中以抹茶同焙茶嘅甜品最受歡迎，甜品嘅款式亦都有好多，包括聖代（雪糕新地）、霜淇淋（軟雪糕）、特飲、窩夫同刨冰等等，再配上白玉、紅豆同抹茶凍等配料。今次我哋就試咗佢嘅招牌甜品──御前抹茶盛合（價錢：$84），同埋今個夏天期間限定嘅御前豆腐聖代（價錢：52）！
溫馨提示：每位Gum''jeng''嘅堂食顧客，最少都要惠顧一份飲品或食物架！
御前抹茶盛合（價錢：$84）、御前豆腐聖代（價錢：52）
左起：抹茶霜淇淋、豆腐霜淇淋、焙茶霜淇淋（價錢：$32 / 個）
評分指數：（5星最高）
幼滑度：★★★★☆
香濃度：★★★★☆（4星半）
抵食度：★★★☆☆
整 體：★★★★☆
總評：焙茶味嘅霜淇淋（軟雪糕）好香，茶味出得嚟又唔太苦澀，出色！而豆腐味霜淇淋嘅豆腐味亦都好濃郁，每食一啖就好似食緊豆腐花咁，好清新，一啲都唔膩！加埋豐富嘅配料，好似脆米、紅豆、果凍同煙韌彈牙嘅白玉，好夾、好有層次！兩款霜淇淋都好幼滑，但由於無添加乳化劑，會溶得比較快。整體都算物有所值，唯獨御前抹茶盛合要$84，但份量就唔多，所以抵食度扣咗少少分！
地址：銅鑼灣名店坊加寧街8-10號地下
電話：34867307
營業時間：14:00-23:00
02. ISEE iSEE Handcrafted Icy Desserts
ISEE iSEE手製雪條係以慢磨機將天然鮮果榨出果汁，再融入北海道牛乳同果肉而成，而且無添加色素同防腐劑架！
雪條總共有30款口味，每日會推出10款。今次我哋就試咗3款雪條：Strawberry Hokkaido Milk草莓北海道牛奶（價錢：$42）、Straight Up Pineapple啖啖菠蘿（價錢：$38），同埋Cheesy Raspberry芝身野紅莓（價錢：$42）。
Strawberry Hokkaido Milk草莓北海道牛奶（價錢：$42）、Straight Up Pineapple啖啖菠蘿（價錢：$38）
Cheesy Raspberry芝身野紅莓（價錢：$42）
評分指數：（5星最高）
香濃度：★★★★☆
抵食度：★★★☆☆
整 體：★★★☆☆（三星半）
總評：Strawberry Hokkaido Milk係ISEE iSEE嘅招牌雪條，雖然草莓味唔太突出，但勝在奶味香濃，而且唔太甜，加埋心形嘅草莓果肉，係女生嘅selfie之選！而Straight Up Pineapple嘅驚喜度就屬滿分，因為佢嘅菠蘿味好出，令人一吃難忘，加埋mix喺雪條入面嘅果肉，食落就好似食緊真嘅菠蘿咁，好fresh，絕對係必食之選！另外Cheesy Raspberry嘅芝士味本身就好濃，但蓋過咗raspberry嘅味，所以食到尾會覺得漏。
值得一讚嘅係禮頓道店嘅服務唔錯，我哋一行三人去試食，店員仲幫我哋嘅雪條平均切成三份，咁就可以每隻味都試到喇！
地址：銅鑼灣禮頓道138號希雲大廈1號舖
電話：23373361
營業時間：11:30-22:30（星期一至星期四）；11:30-23:30（星期五、六）
03. iCREMERiA
講起iCREMERiA，一定會諗起佢signature嘅北海道牛奶雪糕，同日本直送嘅配料，加埋靚靚嘅造型真係無得輸！而小編今次試食嘅雪糕就共有3款：高知縣沢渡茶大福芭菲杯（價錢：$ 53）、日本直送完熟白桃芭菲（價錢：$ 98）同柚子抹茶餡蜜芭菲（價錢：$ 56）。
高知縣沢渡茶大福芭菲杯（價錢：$ 53）、日本直送完熟白桃芭菲（價錢：$ 98）
柚子抹茶餡蜜芭菲（價錢：$ 56）
評分指數：（5星最高）
幼滑度：★★★★☆（4星半）
香濃度：★★★★☆
抵食度：★★★☆☆
整 體：★★★★☆
總評：先講日本直送完熟白桃芭菲，佢入面嘅北海道牛奶雪糕口感幼滑，而且奶味濃郁，係必試之選，不過白桃醬略為搶咗白桃原本嘅鮮甜味。
而高知縣沢渡茶大福芭菲杯入面嘅抹茶雪糕，茶味突出，帶有少許澀味，最驚喜係個綠茶大福，因為佢嘅餡內有沢渡茶茶葉，令成個大福嘅茶味都昇華咗！如果你都鍾意茶味重嘅抹茶雪糕，呢隻就啱哂你啦！
至於柚子抹茶餡蜜芭菲入面嘅雪糕係混合咗北海道牛奶同抹茶雪糕，咁就可以一次過食晒兩個味道！當中嘅柚子大福口感煙韌，但略嫌柚子味較淡。
地址：海港城海運大廈地下OT G03A舖
電話：23866266
營業時間：11:00-22:30
04. GODIVA
GODIVA抹茶曲奇配雙重巧克力軟雪糕（價錢：$50）
評分指數：（5星最高）
幼滑度：★★★★☆
香濃度：★★★★☆
抵食度：★★★★☆
整 體：★★★★☆
總評：GODIVA嘅軟雪糕一向都有好多捧場客，個軟雪糕本身質感幼滑，又唔會太甜，仲好香朱古力味，混合香草白朱古力味嗰邊嚟食，本身已經好好食！有埋個好香綠茶味嘅綠茶脆邊，真係好滿足！唔知GODIVA可唔可以推出成個都係抹茶味嘅雪糕筒呢？！
05. Check In Tokyo
呢間舖頭由日本人開設，由於店家希望將當地嘅雪糕引入香港，所以會用上由大阪直送嘅雪糕漿。呢度最受歡迎嘅係波子汽水雪糕，可惜小編遲咗一步，去到已經賣哂啦，所以就試咗佢新出嘅雙併扭紋雪糕──抹茶配北海道牛乳（價錢：$32）及士多啤梨配北海道牛乳（價錢：$36）。
士多啤梨配北海道牛乳（價錢：$36）、 抹茶配北海道牛乳（價錢：$32）
評分指數：（5星最高）
幼滑度：★★★☆☆
香濃度：★★☆☆☆
抵食度：★★★☆☆
整 體：★★★☆☆
總評：抹茶配北海道牛乳雪糕本應係個完美嘅配搭，可惜兩者嘅味道都略嫌淡咗啲，但雪糕嘅幼滑度尚可。
而士多啤梨味牛乳雪糕嘅味道雖然清新，但係就偏酸。店家話佢哋之所以用竹炭窩夫筒去配士多啤梨味雪糕，係想以帶苦澀味嘅竹炭窩夫筒去減輕啲酸味。雖然咁樣食落的確無咁酸，但係食到最後就有陣苦澀味，所以結論係：味道一般。
地址：旺角登打士街43P-43S號地下9B號舖
營業時間：12:00-23:00
06. Loooop
今個夏天初登場嘅Loooop以食得嘅雪糕杯同可食用嘅紙裝飾引起雪糕控注意！甜品款式共有5款，大部分都係以牛乳雪糕同藍月雪糕做主角，再加上唔同主題嘅配料，仲有一款就係內含朱古力雪糕嘅烤棉花糖！今次我哋就試咗加咗紙裝飾嘅POOL藍月雪糕（價錢：$53）同加紙嘅XOXO牛乳雪糕（價錢：$53）。
POOL藍月雪糕（價錢：$53）
XOXO牛乳雪糕（價錢：$53）
評分指數：（5星最高）
幼滑度：★★★★☆
香濃度：★★★☆☆（3星半）
抵食度：★★★★☆
整 體：★★★★☆
總評：兩杯雪糕嘅賣相都係100分，好靚呀！而味道上呢，先講XOXO，以紅絲絨曲奇杯配上牛乳雪糕，加埋包咗一層糖衣嘅士多啤梨、朱古力碎、士多啤梨脆粒、凍乾士多啤梨脆粒，口感好豐富，而且牛乳雪糕唔太甜，配埋酸酸甜甜嘅士多啤梨脆粒，好match！原本以為包咗糖衣嘅士多啤梨應該唔好食，但食落又好有驚喜，皆因糖衣薄薄一層又脆脆地，仲唔係超甜，而且粒士多啤梨就好多汁同好香甜，正！反而個紅絲絨曲奇杯味道就較淡，只係食得出有少少朱古力味，而且太厚身，食落亦比較乾。
而POOL藍月雪糕就配上牛油曲奇杯、乳酪脆粒，同埋烤棉花糖。藍月雪糕其實係Loooop自家調製嘅味道，我就覺得有少少波子汽水味咁，加埋有啲酸嘅乳酪脆粒，味道特別但唔係人人都接受到。而個牛油曲奇杯就有好香嘅牛油味，味道唔錯！
溫馨提示：落單時店員會問你加唔加紙，意思即係加唔加可食用嘅紙裝飾，唔要嘅話就會平$5。佢張「紙」其實即係米紙，食落無咩味道，但加咗就靚啲囉！
地址：大坑浣紗街2A地下
電話：81928815
營業時間：12:00-00:00
07. Tokyo Secret味之藝術
以「主題特效雪糕」做賣點嘅Tokyo Secret味之藝術分別有3款雪糕，包括有營造出火山爆發效果嘅紅桑子汁配榛子味雪糕──楓之火焰、抹茶味雪糕──森之樹林，同埋我哋今次試嘅北海道牛乳雪糕──冬之富士山（原價：$48；試業優惠價：$38）。
北海道牛乳雪糕──冬之富士山（原價：$48；試業優惠價：$38）
評分指數：（5星最高）
幼滑度：★★★☆☆
香濃度：★★☆☆☆（兩星半）
抵食度：★★☆☆☆
整 體：★★☆☆☆
總評：呢杯雪糕嘅份量並唔多，因為佢個雪糕杯嘅下半部分係裝住乾冰，即係話只有一半係雪糕。佢嘅牛乳雪糕尚算有牛奶味，不過啲雪糕同棉花糖都好甜，只能夠講句連我食得好甜嘅人都覺得太甜！而且啲藍莓酸酸哋，所以整體嚟講佢係咁多間之中最差嘅。
地址：尖沙咀加連威老道52號c地下
電話：61416896
08. Small Potato Ice Creamery
紫薯係呢間雪糕店嘅主角，店長將紫薯焗熟、去皮、蘑蓉，再加忌廉同埋北海道3.6牛奶製成雪糕，所以成杯軟雪糕都充滿紫薯味，而餐單上仲有唔同嘅組合，包括有銅鑼燒、迷你番薯仔、綠茶麻糬、白玉等配料，今次我就試咗番薯派對（價錢：$48）。
番薯派對（價錢：$48）
評分指數：（5星最高）
幼滑度：★★☆☆☆
香濃度：★★☆☆☆（2星半）
抵食度：★★☆☆☆（2星半）
整 體：★★☆☆☆（2星半）
總評：紫薯雪糕最大特色係混入咗紫薯蓉整成，但食落都幾失望，因為佢嘅紫薯味好淡，要混埋紫薯粉一齊食先食得出紫薯味，但係啲紫薯粉就令雪糕失去咗幼滑度。至於啲配料都係一般，好似番薯仔雖然唔太甜，但就略為乾咗少少，只得蕨餅較好，因為佢煙煙韌韌好有口感。
地址：銅鑼灣希雲街28號-30號
電話：26189032
營業時間：14:00-23:00
09. LOL Ice-cream x 波霸汽水
款式多多嘅LOL Ice-cream以粉藍色雪糕同黑色cone做賣點，用咗北海道牛奶做雪糕，再分別加上棉花糖、海鹽焦糖、焦糖脆粒、繽紛樂朱古力等配料，價錢由$28至$42不等，可以再額外加錢配搭某幾款配料。今次我就試咗爆谷棉花糖雪糕（價錢：$42）。
爆谷棉花糖雪糕（價錢：$42）
評分指數：（5星最高）
幼滑度：★★★☆☆
香濃度：★★☆☆☆
抵食度：★★☆☆☆（2星半）
整 體：★★☆☆☆（2星半）
總評：賣相唔錯嘅棉花糖雪糕食落其實好狼狽，大大個棉花糖超級甜，而且佢完全蓋住個雪糕，所以要拎走個棉花糖（或者食晒佢）先食到雪糕。雪糕尚算幼滑，但本身已經甜甜哋，加埋棉花糖可以話係十級甜！至於個黑色cone就無咩特別味道，所以入面最好食嘅係香脆可口嘅爆谷。
地址：銅鑼灣禮頓道106-126號禮信大廈地下20號舖
電話：23863361
雪糕供應時間：14:00-21:00
登入 瀏覽本網站，可獲取積分換領專屬優惠
點擊查看專屬優惠
立即訂閱接收Cosmo最新潮流資訊
訂閱電子報，時刻掌握生活資訊！