12 星座嗌交攻略！

同朋友或另一半嗌交，喺日常生活中總是難免的，但要懂得嗌、將大事化小，或找到解決方法，先係嗌交嘅藝術，針對不同星座，策略都會有所不同。

同白羊座嗌交

白羊座衝動又意氣用事，很容易發脾氣，一嗌起上黎就好似噴火咁，一輪嘴將不滿講哂出嚟。而且白羊座一定要嗌贏，否則唔會罷休。其實對住白羊座，就由得他發吓脾氣，切忌火上加油，因為佢發洩完就冇事。

同金牛座嗌交

金牛座一嬲起上嚟，其實唔太識用言語去表達，所以好多時都係谷住道氣，與其話嗌交，佢可能係唔睬你。對於金牛座，要慢慢安撫，俾啲美食或擁抱佢，等他感受到你嘅關心，自然下咗啖氣。

同雙子座嗌交

跟雙子座嗌交，真係視乎你自己本身口才好唔好。雙子座嗌起交上嚟，其實無咩焦點，東拉西扯的，有時講吓就算，甚至他會幾賴皮，所以對住佢，認真就輸了，當作係另類溝通方法就得啦。

同巨蟹座嗌交

同巨蟹座嗌交，實在有點痛苦，因為巨蟹座情緒一爆發，真係唔係簡單，可能會大哭大鬧，又可能會黑你面乜都唔講。其實對巨蟹座，唔係要講道理或誰對誰錯，只要向佢表明你的關心、聽他發吓牢騷就得。

同獅子座嗌交

獅子座發脾氣，就好似獅吼咁，而且佢總係覺得自己高高在上，有佢講冇你講。同獅子嗌交，最忌硬碰硬，當佢發完脾氣，當氹細路咁氹佢，讚吓佢，好快就冇事，轉頭佢又對你回復熱情。

同處女座嗌交

對住處女座，其實唔算係嗌交，因為他只是會囉囉嗦嗦的碎碎唸，語氣唔會好重，但可以好刻薄。而且佢又有好多道理，沒完沒了。如果你已被他唸到頭痛，最好不要同佢纏落去，否則唔知講到幾時先講完。

同天秤座嗌交

天秤座最討厭嗌交，因為他只尋求和平，亦不能破壞佢優雅嘅形象。所以天秤座式吵架，其實是辯論、講道理。只要你能同樣冷靜地將不滿拎出來討論，大家好快會達到共識。

同天蠍座嗌交

天蠍座情感激烈，有時表面冷靜，但句句都會刺中你嘅死穴，有時會完全唔理你，等你嚇餐死，有時又好激動。但其實對佢嚟講，嗌交係代表彼此的重視，因為外人根本無法觸動佢嘅情緒。同天蠍一齊，嗌交倒是用嚟增進感情的。

同人馬座嗌交

人馬座嗌交嘅時候，講嘢係會特別誇張，情緒又激動，好鬼戲劇化，但你打個折頭就得，唔好放喺心上，因為佢講完又當冇事發生過，唔會記住，繼續嘻嘻哈哈。

同山羊座嗌交

山羊座平時忍耐力好強，但忍得咁上下，就會爆發。當佢真係要嗌交時，就代表事情真的很嚴重，他真的忍無可忍了。不過其實山羊座實事求事，只要你都認真一點，同佢一齊搵出解決方法就得，唔好鬥氣。

同水瓶座嗌交

水瓶座情緒冷靜又疏離，無論內心有幾激動，還是會冷冷的同你表達和討論佢嘅不滿和想法。對着他，千萬不要鬧情緒，因為他會受不了而跟你切斷對話，所以只要同樣的保持心平氣和，自然可以解決問題。

同雙魚座嗌交

雙魚座敏感又情緒化，嗌交嘅時候，就好似小朋友一樣，好容易就會喊（就算男生都會忍唔住有點哽咽）、扔東西，吵吵鬧鬧的。跟他不要講什麼道理，只要俾佢好好咁發洩，再氹小朋友般安慰他，好快就冇事。