本鮪盛宴！任食大拖羅+18款吞拿魚菜色

如果你鍾意食拖羅，一定唔可以錯過鮨処光呢個本鮪盛宴！
 

店家一向以供應由師傅發辦（omakase）套餐為主，而呢個盛宴保留咗師傳發板嘅特色之餘，仲會以放題形式進行，你可以喺兩個半小時內任食接近20款吞拿魚菜色，而且所用嘅吞拿魚係每日喺長崎運返嚟架！當中最令我欣賞嘅，係師傅會令你盡量喺呢一餐入面試到吞拿魚唔同嘅部位，好似下顎肉、面頰肉及魚尾等！
 

而最令我回味嘅，係燒拖羅海膽三文魚籽、大拖羅白蝦卷、大拖羅、柚庵燒吞拿魚下顎肉、汁燒吞拿魚面頰肉及汁煮魚尾。

燒拖羅海膽三文魚籽一入口係講唔到嘢架，因為沉醉緊喺甜甜嘅海膽同三文魚籽嘅鮮味當中；大拖羅白蝦卷加上紫穌葉，其香味可以中和油膩感；大拖羅唔使我多講吧，新鮮又肥美，好好味；柚庵燒吞拿魚下顎肉好香柚子味，而且下顎肉嘅質感好得意，好似肉咁，加上燒得極香，又係停唔到口之作；汁燒吞拿魚面頰肉要夠新鮮先唔會腥，而食落真係無腥味，好香魚味又好滑！至於汁煮魚尾，係用上燉煮嘅方法炮製，塊魚皮整得超滑，好似食緊花膠咁架！

菜單：

前菜（共六款，每日由師傅精選兩款）

免治吞拿魚森薯海膽杯、吞拿拿魚赤身沙津、吞拿魚免治豆腐吉列、醬油漬配牡丹蝦蓉、赤身豆腐油盜卷、吞拿魚免治白魚漢堡

 

刺身

本鮪刺身六點，包括大拖羅、中拖羅和赤身