image with no details

認清8個殘酷真相 令你活得更開心!

26 Nov 2013

生活, 快樂

人人都話人生係要自己去創造,面對高低起跌,你嘅態度同行動往往影響繼後嘅事。能夠早啲認清唔容易接受嘅事實真相,有助你生活得豁然開朗。

1.朋友來又去

朋友圈子總係如流水般來又去,一輩子嘅朋友未必係必然。試回想由小學升讀中學,如果你同死黨無派到同一間學校,當各自認識咗新嘅同學後,即使住得近,友情都好容易漸漸褪色。同樣情況一樣發生喺轉工,每轉換一次新環境就會出現新嘅朋友,即使大家而家感情有幾緊密,幾年之後環境改變咗,彼此的溝通方法改變了亦係平常嘅事。

溫馨提示:接受永遠嘅朋友唔係必然,當你面對友情無聲無息地逝去時,以平常心對待,並同時接受大家的相處模式會隨時間、環境而有所調整。話雖如此,其實生命中仲有好多精彩嘅人同關係等待你去發掘,即使呢一刻你無知心友,唔使緊張,友誼總係有無限嘅可能性。

<<閱讀更多>>心理測驗:你唔夠錢用嘅原因係?

生活, 快樂

2.心想不一定會事成

人生總係有唔如意嘅事,簡單如小時候,你可能諸多暗示/明示仍然收唔到想要嘅生日禮物。長大後,經常面對其他人遲到浪費自己時間、令你失望嘅人同事、想買嘅東西買唔到……等等。

溫馨提示:唔好將快樂建築喺物質上,面對大大小小唔如意嘅事,學習接受,人生苦短,唔值得為小事抓狂!反而應該認真諗諗你「想」嘅事係咪不切實際或根本唔係你想要嘅。

<<閱讀更多>>心理測驗:最適合你的減壓良方!

 

生活, 快樂

3.總有啲人愛/不愛你

無論你係明星、義工、OL、學生……每一個人喺人生中,總係有啲人愛護你,亦有啲人無緣無故唔鍾意你,你可推斷出無盡嘅因由,如妒忌或純粹因為你唔係佢杯茶,總而然之,無人可以獲得全宇宙嘅喜愛。

溫馨提示:有人唔鍾意自己又如何?你都有唔鍾意嘅人啦。其他人花時間去斟酌是佢哋嘅問題,你絲毫無損,你仍是你,你唔需要從人哋嘅喜愛嚟成就自信。

生活, 快樂

4.只有你能改變自己嘅生命

別人嘅關注、like、加油打氣鼓勵只係助燃劑,真正令人生發光發亮,仍然係要靠自己努力。

溫馨提示:為自己籌謀,學習解決問題,你依賴嘅人(父母、兄弟姐妹、同學、男朋友)唔會成日喺你身邊幫忙,其實你都唔需要依靠他人過活。

生活, 快樂

5.失敗有時

無人唔會犯錯,失敗嘅經驗人人皆有,考試、工作、比賽甚至係朋友問嘅IQ題,你都可能唔達標。

溫馨提示:失敗乃成功之母,將來成功與否,在乎你能唔能夠汲取當中寶貴嘅教訓。面對失敗,要欣然接受,從失敗中學習先會成功在望。

生活, 快樂

6.事情總係節外生枝

興高采烈準備一切出外郊遊,突然天氣變壞成唔到行;或者係精心籌備好嘅計劃書,竟然因為電腦壞咗無備份而要由頭整過。咁黑仔嘅事,總係殺人一個措手不及,令人沮喪。

溫馨提示:唔好為自己控制範圍以外嘅事抓狂。學習應付突如其來嘅變化,你唔可以令時空逆轉改變過去,但你可控制自己面對事件嘅態度。

生活, 快樂

7.希望不是在明天

我哋永遠無法預計自己下一刻遇到嘅事:車禍、心臟病發、意外,甚至世界末日都可能出現。飛來橫禍,只能面對,但可能唔係如你所想。

溫馨提示:把握當下,愛要愛得及時,表達對家人/朋友/愛人的關心,唔好為小事執着,花多啲時間做鍾意嘅事。

生活, 快樂

8.人生是不公平的

無論係金錢、愛情、朋友,甚至係Facebook likes,樣樣要比較,總有其他人比自己更優更強。

不斷追求想要嘅嘢,其實有一個十分重要嘅教訓……

教訓:純粹因為擁有較多,就會開心啲嗎?揭開任何一本名人傳記,總係睇得出佢哋鍾意努力嘅過程,多過財富帶嚟物質上嘅快樂。即係應該將注意力集中在你喜愛嘅事上,而唔係呢件事能夠帶俾你嘅好處,反正好處自然會來。:)

image with no details

ADVERTISEMENT
CONTINUE READING BELOW

立即訂閱接收Cosmo最新潮流資訊

訂閱電子報,時刻掌握生活資訊!