115款芭菲任你揀！日本UFUFU CAFE登陸香港

呢度可能係最多芭菲俾你揀嘅甜品店，因為有成115款咁多，就算每日食一杯，都要4個月先試得晒！ 另一個特點，係7成食材都嚟自日本，而且雪糕仲係自家製嘅！花多眼亂唔知揀邊款？等小編推介俾你啦！



呢兩款為香港而設嘅口味，每日限量供應各20客。

豆腐花 x 芒果芭菲$78（上圖右）

底層滑溜溜嘅豆腐花配埋芒果雪糕、雲呢拿雪糕，加上芒果、雜果同鮮忌廉，食落唔會好漏，讚呀！

港式鴛鴦芭菲$78（上圖左）

底層係店家自家製嘅咖啡暏喱，咖啡味勁濃，加埋奶茶味雪糕、咖啡雪糕，時令水果同鮮忌廉，連唔好咖啡嘅小編都好鍾意，如果要俾分，佢係小編所試過嘅當中最高分嘅！



超級和風芭菲$298（上圖右）

同一班frd子一齊食或者慶祝生日，一定要點呢個，店家話係6人分量，小編就覺得再多人啲都夠食！因為入面有6-7款水果、15球雪糕！
話明係和風，當然有好多日式嘅elements ！好似丸子、蕨餅、綠茶醬，加埋栗子，生果同雪糕，滿足到喊呀！
值得一提係，凡於生日或特別日子惠顧呢個超級和風芭菲或者超級鮮果芭菲，將可免費獲得朱古力牌寫字服務！

朱古力香蕉梳乎厘班戟（上圖左下）

將梳乎厘同班戟結合，厚度超過3cm，食落就好似非常鬆軟、密度較低嘅蛋糕，再配上最夾嘅組合：朱古力雪糕加香蕉，係芭菲以外嘅選擇。



宇治抹荼芭菲$68

呢個宇治抹荼芭菲以抹茶雪糕、雲呢拿雪糕、配上嚟自日本嘅栗子、紅豆蓉、丸子同日本宇治抹茶醬，最正係面頭加咗啲紅莓粒，靚之餘，又加添一抹清新嘅感覺，抹茶控必點呀！



Tiramisu蛋糕士多啤梨朱古力芭菲$76

入面有Tiramisu雪糕、士多啤梨同朱古力雪糕，加上士多啤梨醬、鮮忌廉、Tiramisu蛋糕及粟米片等，口感豐富。當中Tiramisu雪糕好香咖啡味，而且口感較rich。



比利時朱古力蛋糕栗蓉芭菲 $76

由Tiramisu味雪糕、比利時朱古力醬、脆米、Tiramisu蛋糕，栗蓉同時令水果組成，呢個組合好特別，因為坊間較少以栗蓉為主打嘅芭菲。



此外，呢度仲有一系列鹹食架，好似熟成牛腹扒（180g $188、120g $148）、蜂蜜芝士薄餅（$58）及和風鐵板拿破崙意粉（$68）等。



UFUFU CAFE

地址：尖沙咀金馬倫道5號太興廣場5樓
電話：‪2711 6117‬‬
營業時間：中午12時正至晚上11時正