小編平時超鍾意食蒜，所以一見到嚟自韓國嘅Mad for Garlic登陸香港，真係開心到要跳起yeah！
喺韓國有 38 間分店嘅Mad for Garlic，以韓風意大利菜為主打，呢度有九成菜式都以蒜頭入饌，而且係嚴選嚟自韓國慶尚南道昌寧郡同慶尚北道義城郡嘅蒜頭！另一特別之處，係店家會因應唔同嘅菜式，將蒜頭分別以炸蒜片、炸蒜粒、炸原粒蒜頭、油浸、醋醃、焗蒜粒、原個焗蒜、生蒜粒、生蒜片、醃蒜芯及糖漬嘅整法登場！
餐牌大致分為麵包、沙律、薄餅、意粉、牛扒及甜點6大類，當中有唔少創意菜式，好似用上 60 克蒜頭入饌嘅「MFG 特色蒜蓉包塔」（$48），法包上鋪滿生蒜蓉，焗至香脆，最後撒上紅椒粉調味，極脆口嘅法包加上生蒜，小編食到停唔到口呀！
另一推介係「烤 MFG 招牌澳洲肉眼扒配蒜頭山」（$188），呢道菜係整個menu上用咗最多蒜嘅。將澳洲肉眼扒烤香後，鋪上50 克生蒜，再以 60 克炸蒜片覆蓋整塊肉眼扒，由蒜粒同洋蔥等整成嘅蒜山加上上檯時嘅「滋滋」聲，絕對係要相機食先！ 
「蝦、菠蘿、炸蒜片 MFG 招牌意大利薄餅」（$108）嘅餅底以韓國麵粉搓製，頂層鋪上蝦肉同菠蘿，加上炸蒜片同即刨嘅巴馬臣芝士，味道鮮甜又清新！
至於「招牌蒜片墨西哥辣椒炒意粉」($88)特別選用較幼身嘅14號意粉，以蒜片同墨西哥辣椒炒香，非常惹味，好辣者必食！不過溫馨提示一下，真係好辣下架！ 
而「鐵板醃漬蒜頭、煙肉及飛魚籽炒韓國牛油飯」($128)選用韓國總店製作嘅「牛油米」炮製，將韓國米以牛油炒香後，包裝好就立即空運到港，除咗醃漬蒜頭，仲配有煙肉同飛魚籽，口感豐富之餘又好鮮味！
閱讀更多>>睇見都想食！日本Pablo、Haagen-Dazs白桃味甜品
甜品方面，不妨試試「蒜頭香蕉朱古力醬薄餅配自家製雲呢嗱雪糕」（$68），入面嘅原粒蒜頭以糖水醃製，入口爽甜，感覺好得意，唔係好覺食緊蒜頭，伴以自家製嘅雲呢嗱雪糕同韓國入口嘅黃豆粉，夠晒特別！
Mad for Garlic
地址：銅鑼灣時代廣場食通天11樓 1104 店
電話：3752 2880
登入 瀏覽本網站，可獲取積分換領專屬優惠
點擊查看專屬優惠
立即訂閱接收Cosmo最新潮流資訊
訂閱電子報，時刻掌握生活資訊！