那些《幕後玩家》沒有告訴你的關公辛酸

by 毒菇

TVB《幕後玩家》劇照

很多人一聽到公關二字,腦海馬上出現窮奢極侈四字:每天出入最高級的餐廳,而且不用排隊也不用訂位,指住個鼻就可以大搖大擺的走進去,張單仲要係公司或者個客埋,真係爽到無朋友。

實情!?作為記者,少不免與公關聯絡。愛出風頭的公關當然存在,但只限高層,而且也只停留於表面風光,例如流連ball場、搶著與明星自拍集郵post上IG呃like當正自己KOL,但係come on James,佢都係苦心經營緊自己嘅形象、做緊自己個IG嘅PR啫,絕對不至於《幕後玩家》預告片中嘅綠色林寶與拋車匙或撞跌杯丟錢,咁樣咪即係倒自己米!

學劇中靚女新丁Emma(劉佩玥)話齋,公關其實係公共關係嘅縮寫,要為客人的產品或品牌建立形象,又要同傳媒打好關係,仲要識得處理危機,亦即係關公災難。又要面對個客,仲有老細,又要顧及公眾,同埋傳媒問長問短,真係少啲禮貌、少啲耐性、少啲EQ、少啲教養都已經@*&$(#*&$(#*(@。

再講,而家個個都識拍片,如果其身不正點會無人知。做錯嘢拋疊錢出嚟就叫處理咗,仲土豪過啲金舖裡面嘅真正土豪的話,叫啲客人點buy你呢。況且,呢個年代仲邊有人帶咁大疊錢出街架!

可能你會問,公關行業一直都在,為何近年這麼多災難?一字記之曰,經濟差!客人不再花錢投資昂貴的硬性廣告,改以更便宜的軟性公關推廣。最弊客人只得蔗渣嘅價錢,卻想要品嘗燒鵝嘅美味。

例如客人會忽發其想,突然要求公關用一個星期時間為新產品辦發佈會,要有主題、有聲有色,更要請到全香港每位記者到場,天王巨星都要在席,但講到最現實的budget呢,可能只得雞碎咁多。

公關嘅難處,在於得一個禮拜時間,要幫客人諗到一條好橋包裝新產品發佈會,要搵個啱嘅場地、搵人搞台燈聲,仲要搵晒全香港嘅記者,同埋搵明星,每一個步驟都係難關,因為每個決定都要畀客人覆。我相信每個人都試過對客,都試過與客人來來回回confirm、re-confirm、double re-confirm、final confirm、final re-confirm.....大戰二百回合。

為了滿足客人的需要,公關只能通宵達旦,默默耕耘。與客人大戰期間,仲要邀請同客人一樣咁鍾意confirm人嘅大牌明星,同埋邀請全香港每位記者對場。你可能又會問,叫記者有幾難。記者有得離開office,又有samples送畀你試用,一定仆到嚟。實情係記者一日收到九百幾間公關公司嘅發佈會邀請,一日裡面有十個發佈會,可以去得邊個?而且記者有好多稿要寫,寫到家吓凌晨都未寫唔完呀。

Anyway,公關們,一句講晒,bro I know that feel!

話說回來,大台劇集質素人所共知,也能理解將平凡的橋段誇張演繹搏收視,但預告片中蕭正楠和黃宗澤的沒禮貌與土豪行為,誇張得來欠缺常理,搏得全城討論卻都是負評,而張繼聰的在電梯與女子車輪戰更是離譜,我想大家是在說公共關係的專業,不是在說夜總會裡的男公關吧!

LOAD MORE