《5種職場好同事,為你增添返工嘅士氣》

by 弓仁

《5種職場好同事,為你增添返工嘅士氣》

 

職場之上,衰人多,但好人都仲有。為咗令世界增加返些少希望。今日就列出我遇上過嘅5種好同事,等你喺畀人跣鑊金嘅時候,都可以咬緊牙關,堅信人間有情。

 

1:關懷型

佢似阿媽,又似阿爸,雖然工作上冇多合作,但對你都係噓寒問暖。有時見你自己一個,又驚你遲Lunch,有零食又會預埋你。佢祥和佢佛心佢好人到痴孖根。

 

2:收風型

職場滿佈小圈子,邊個唔妥邊個;邊個同邊個撻著咗,呢啲冇咩人知,暗暗嘅關係線,有機會令你深陷危機,瀨大嘢!但好在有個天文台。呢位天文台好人在佢唔止收風叻,佢仲唔介意同你分的。而且唔放流料害你,反而用堅料拯救你。佢好似守護天使咁……「我會變成童話裡~~你愛的那個天使~」

 

3:禮節型

咩叫「禮節」?就係「咩都禮貌地問你一句。」

「你去唔去食Lunch呀?」

「聽日個公司活動你去唔去?」

係,其實佢唔太Care你去唔去,但呢種「禮節性」好重要。

舉個例子,有一日你真係好想同班同事食Lunch,但平時又冇Join開……你知唔知一句「喂!我今日又去」係幾面懵?

但佢只要行埋嚟:「你一唔一齊呀!」你就可以順理成章:「好呀!

 

4:IT型

雖然你公司可能有IT部,但你都知要搵佢哋係有一定困難程度!而有啲同事就係精通IT同各樣software加Printer

壞Printer搵佢!開唔到Email搵佢!想Download個程式搵佢!

佢可能覺得自己係一隻「IT狗」,但喺大家眼中其實係好同事。

 

5:亦師亦友型

佢大粒過你,甚至你直接under佢。但佢冇階級觀念,同你共同進退,相敬如賓。傾日常話題,亦唔會覺得自己威過你。呢種人難搵,因為要一個人完全冇「老屎忽」概念,的確非易事。

LOAD MORE