香港人的集體回憶!必掃5款富豪雪糕x 日本TRAVELER’S 精品

by HY

每次當藍色多瑙河的音樂響起,除咗廣告同維也納你會諗起乜?講起紅、白、藍三種顏色,除咗膠袋你又會諗起乜?喺香港,竟然仲會有一種橫跨四十年嘅集體回憶,歷久不衰咁代表住本土文化。嚟香港旅行嘅人都一定會知道呢樣嘢。每當你行過鬧市,一定會見到佢嘅身影。

冇錯,佢就係富豪雪糕。

當大人小朋友一聽到富豪雪糕流動車(Mobile Softee)的音樂,就自然知道總有一架雪糕車喺附近。

香港夏天一年比一年熱,有時行街真係想食返杯雪糕解暑。但係你有冇諗過雪糕唔只食得、睇得,仲用得?鐘意去旅行嘅你一定聽過TRAVELER’S COMPANY呢間日本殿堂級旅人手帳品牌。嚟緊7月21至8月6日,TRAVELER’S將會同LOG-ON合作,喺太古城中心開設Pop-up Store,售賣一系列以「富豪雪糕」為主題嘅旅行文具產品。睇吓下面嘅產品,會唔會勾起你嘅回憶,同時又想歎返杯軟雪糕?(食軟雪糕 雪糕 雪糕…)

 

必儲文具1:「富豪雪糕」Notebook Refill

主打一定唔少得記錄旅行點滴嘅筆記簿。今次TRAVELER’S 推出2款唔同大細嘅notebook refill,有正常size同passport size,仲喺封面加上筒裝同杯裝嘅圖案設計。捲起notebook拎上手唔單只有拎住雪糕實物嘅感覺,望得耐咗,其實真係會飽飽哋。

 

必儲文具2:「富豪雪糕」Cotton Bag

呢一款布袋,靈感就嚟自「富豪雪糕」嘅外賣袋。嗯,旅行拎出街方便之餘,仲可以袋多幾杯雪糕。

 

必儲文具3:「富豪雪糕」懷舊貼紙

嚟到文青最愛嘅環節!TRAVELER’S會推出多款懷舊「富豪雪糕」貼紙。除咗有唔同年代嘅「富豪雪糕車」款式同Logo之外,仲會有埋Menu俾你哋揀!各位,揀好要邊隻未(味)?

 

必儲文具4:「富豪雪糕」懷舊膠紙

貼紙唔啱心水?仲有膠紙!如果覺得notebook唔夠懷舊,呢啲膠紙一定會增加佢哋嘅色彩。圖案係根據雪糕車同雪糕款式設計㗎!好靚呀!

 

必儲文具5: 「富豪雪糕」銅製原子筆

最後,notebook當然要有筆啦!Pop-up Store都會有TRAVELER’S專門製作嘅銅製原子筆。寫落去嘅觸感,就好似食到「富豪雪糕」果吓咁柔滑。食唔到,都feel到。

 

睇到呢到都已經又想食雪糕,又想買嚟去旅行用,Pop-up Store仲會有TRAVELER’S自己嘅產品售賣,仲唔快啲Have A Ice Trip!

 

LOG-ON X TRAVELER’S FACTORY HONG KONG POP-UP STORE

日期:2017年7月21日(五)至8月6日(日)
時間:每日10:30 – 21:30
地點:太古城中心二樓中橋

*TRAVELER’S X 「富豪雪糕」產品另於8月2日於日本發售。

LOAD MORE