恐怖King Sir老是常出現:6套upcoming要睇嘅史提芬京改編電影電視劇

By COSMO

恐怖大師史提芬King ,一直主宰外國電影電視界,《閃靈》、《綠里奇蹟》、《危情十日》套套驚典過經典,原來呢兩年仲繼續嚇死你,至少有十套改編佢嘅電影or電視劇。冇錯,係十套呀,呢輪有《黑魔塔》、《小丑回魂》,Netflix又有一大堆,好似《The Mist》咁,真係恐怖大King。



1)《黑魔塔》(Dark Tower)


入場睇過《黑魔塔》,可能你會呻笨,因為平行宇宙行出又行入,估佢唔到,影帝Matthew McConaughey做奸角兼戲份唔係好多好多。之但係,原著絕對係King Sir的驚典同名長篇小說,長篇長到多達八本,講正義同邪惡嘅永恆抗爭。大銀幕之後,電影前傳嘅故事,Sony亦講明會拍成美劇,估計下年播出。



2)《小丑回魂》(IT)


相比之下,《IT》就打正旗號,嚇鬼死你,改編佢喺1986年出版嘅小說,IT其實係it,死物「它」之餘,又係動物「牠」,故事講述7個細路對抗小丑邪靈的故事。1990年老早被改編成電視劇,今次仲有《Stranger Things》細路主角之一演出,全新電影版有啲睇頭喎。



3)《迷霧/霧地異煞》(The Mist)


怪霧來襲,黑暗降臨,恐懼吞噬一切⋯⋯呢句係十年前《Mist》嘅宜傳tagline。呢場霧霾唔係嚟自大陸,而係怪獸,同埋人性陰暗面!

今年美國SpikeTV拍成同名美劇,繼續撥著大霧默默地在覓我的去路,Netflix有得煲。



4)《Castle Rock》


最強鬥最強,大師鬥大師!Stephen King聯手J.J.Abrams,上年幫Hulu拍過《拯救甘迺迪》(11.22.63),一拍即合之後繼續拍,又幫Hulu拍十集美劇《Castle Rock》,結集大師同名故事嘅好多內容,出發去呢個虛擬小鎮⋯⋯

 

 

5)《1922》


以下兩套介紹嘅改編電影,都係Netflix出品。首先第一部係《1922》,亦即係幾年前King Sir《暗夜無星》(Full Dark, No Stars)小說集入面嘅故事。故事背景係1922年,但好似而家嘅情節,農場老闆娘想賣走農場搬到城市,老闆想維持原狀,企圖說服個仔一齊殺死阿仔老母,即係佢老婆,結果老闆娘死咗,陰魂不散,老闆自己就俾老鼠咬,精神錯亂兼自己咬死咗自己,超恐怖。



6)《Gerald's Game》


另一部Netflix電影,叫《Gerald's Game》,改編自1992年嘅長篇小說。故事由一對夫妻嘅SM開始,老婆俾老公用手扣扣住,點知反抗時殺死咗老公,自此被鎖喺床邊嘅老婆,都唔知死唔死好,當然唔開心、恐怖回憶、真真假假嘅景象,令佢痛不欲生⋯⋯Netflix今個月尾喺美國版面上架,香港區未知有冇。

 

 

 

延伸閱讀:海洋公園哈囉喂炮製廟宇殭屍、黑暗城寨 嚇到你暈!

延伸閱讀:你敢唔敢自己一個人睇?7套全新驚慄片等緊你

 

LOAD MORE