7個簡單道理!面對山一樣的工作,你應該選擇...早啲訓!

by 新東由紀

夜已深,但工作依然很甘!
唔係你平時懶,而係啲工作量根本超出你working hour……

唔做完又唔得,但做得嚟都天光!
但全部嘢又好似已經冇得再等!!呢個時候,你應該…………

 

去瞓。

 

點解?等我話你知。

 

原因一:其它人...一早已經!瞓!晒!啦!

工作好多,但你肯定係你一個人責任?緊係唔係啦!

咁其他人呢?搵緊周公啦!既然大家都放棄咗,你何必要辛苦自己,獨自承受?

周公歡迎你!所以,去瞓啦。

 

原因二:專心做同眼瞓住做嘅速度分別

眼瞓時即使做,基本上都係亂做。
當你清醒返就想del晒佢。
咁又有咩意義呢?

反而瞓醒一覺,
和暖嘅秋風包圍住你寂寞嘅body,引發你嘅思潮,
迅速完成高質工作。

所以,去瞓啦。

原因三: 你估真係會死人咩?

放心啦,你冇咁重要。
你嘅工作做少咗,遲少少其實唔會死人。

如果你係咁重要,
我相信佢哋都唔會明知做唔晒,但都逼你做。

所以,去瞓啦。

原因四:人類係得寸進尺,老闆係得尺進丈的

唔合理嘅工作量,
你今次通宵幫佢哋搞惦。

聽日等緊你嘅,
就係更唔合理嘅工作量,

所以,去瞓啦。

 

原因五:工作只係呢一秒重要,但你人生有80年 

有個前輩,奮鬥60年,
年中無休,良好儲蓄,為嘅就係退休後可享受生活。

退休後數月,佢撒手人寰。 

件事好令人傷心。

當你用「人生」去做一個世界觀,
呢一分鐘嘅工作,其實可能冇咩大不了,唔值得你放棄自己嘅健康。

 

原因六:你不是超人~你改變不了太多

每個人都有英雄主義!覺得一人之力可以扭轉所有。

但你唔係Super Hero,
呢個薪水都請唔起Super Hero。

即使你用生命力硬接,有啲工作,都係需要「時間」才可完成!

所以,去瞓啦。

 

原因七: 這個世界很多deadline都是假的

 

這是一個博奕。

有時佢set個好急嘅deadline畀你,
其實係想你做快啲,咁佢自己就可以慢慢做。

所以,
好多時啲deadline都係有buffer位,
而且係為咗自己可以懶啲,就犧牲一啲有責任心嘅同事(例如你)。

所以,要摸清個真deadline,而唔好盲目相信個假deadline。

一句講晒,唔係唔做,
但時間一定要合理!

都係嗰句,對自己好啲,去瞓啦。

LOAD MORE