《5種經常出現,卻會令你失敗的人生概念》

by 新北由紀

如何做人,係一個大學問;
如何做一個成功嘅人,係一個大問題。

但成功之前,人生流流長,總有幾個概念圍繞身邊,而且會令你失敗!

 

1.「我未出全力啫,唔係我都做到啦」

睇見人哋成功,你總不懷讚賞之情,
反而心中一句「我出全力都做到啦。」

有時候係咁,
「因為唔參戰,所以我冇輸。」
但你都冇贏,仲永遠都唔會贏。

你仲要等到幾時?先肯無悔咁全力一次?

 

2.「仲有其他人差過我,我都唔係好差啫」

 

人望高處,水向低流。
有時望下下面,搵啲差過自己嘅人做對比、做安慰對象,
內心係開心嘅,係精神嘅。

不過你一抬高頭,就會發現自己……
都成為好多人嘅「對比對象」。

 

3.「嚴人寬己 - 人哋成功就係好彩;自己衰咗就係黑仔」

總之你將一切努力同能力值都棄之不顧,
將所有事總結於兩個字-「運氣」。

你成功?你有運囉!

我失敗?我冇運呀嘛!

呢種概念可以令你對好多事釋懷,
同時令自己長時間……裹足不前。

 

4. 「用結果去推敲過程」

呢個有啲難解釋,我決定用一個例子說明。

啲數學MC題,有班同學好鍾意做完之後對答案。

例如佢哋答錯咗,知答案係「A」。
佢哋就會依住
「答案係A,點計先會計到A出嚟呢?」嘅思路。

多數佢哋會「夾硬」搵到個計到A嘅方法,但其實係錯嘅,
純粹係滿足「我計到A啦」嘅心情。


到下次遇上相同題種,佢哋冇咗「正確答案」嘅前設下,
都係會計錯。

IF A, then B;IF B,不一定是A。

好多人用成功咗嘅事例,你100%咁參考,
最後只會得到一條錯誤嘅算式。

不要「你咁樣做成功喎!我照做先」
試著「思考要點做,先有屬於自己嘅成功」

 

5. 「我仲細呀嘛!」 

初入社會,撞板又好、做得差亦好,想hea做也好,

你都會講一句「我仲細呀嘛!」

冇錯,經驗未夠,成為你嘅擋箭牌,但慢慢你發現…

你已經由公司最細嗰個,變成第二細、變三細、

到第四大……

 

再唔細,你都大個啦。

睇見有啲同年嘅人,已經開始出頭,

因為佢哋一直抱住另一個想法:「我年紀比較細,但我都可以比所有人強。」

 

係,你都可以。

 

LOAD MORE