最討厭汗臭、猥瑣、大大聲! 十大搭車隔離位最乞人憎選舉

by 二弟

日日返工都要搭巴士搭地鐵,唔通日日都想返工想搭車咩?於是乎,返工搵位坐搵位企,好早已經係一個生活學問,除非你有人揸車送你返工或者餐餐坐的士啦!咁既然要繼續返工,繼續逼車,就求神拜佛唔好預到隔離位做啲乞人憎事。以下十項「侵襲」真係好乞人憎,你又最憎邊樣呢?

 

 

1) 肉體侵襲

 

姊妹坐車驚畀人博懵、揩油,如果佢真係大搖大擺出手嘅話,我都可以大叫非禮,但有時都唔知對方係真博懵,抑或唔係有心。例如瞓覺瞓到挨埋過嚟,或者大肥佬坐隔離貼住你隻腳,呢啲出聲又唔係,唔出聲又自己蝕底,真係好乞人憎。

 

2) 氣味侵襲

身體接觸,第一時間要嗌唔好,咁味氣攻侵襲呢?返工好少見,放工最普遍,一個個大叔放工上車,有啲做地盤,有啲做廚房,唔係想歧視佢地,但佢地一個二個都好臭,臭汗味、臭狐味、油益味,臭味應有盡有,如果唔好彩遇多兩個打完波滿頭大汗嘅後生仔,真係同一車廂下,坐邊個位都一樣咁難頂!

 

3) 聲音侵襲

 

點解巴士冇靜音車廂?就算有,大家都唔係好守規矩!坐車果陣,總係有啲大叔大嬸,開住喇叭睇片聽老歌,又或者有啲人大大聲講電話,慌死其他人聽唔到,呢啲聽多一陣都會忟憎,而且罪無可恕!

 

4) 視覺侵襲

 

每個人嘅第一官感,一定係雙眼行先。夏天最大鑊,呢邊背心阿叔露晒格肋底毛,果邊就貼身Tee凸點,前面就滿面暗瘡,斜對面上身ok,下身踢拖腳甲綑黑邊,雖無過犯,面目可憎,唯有瞇實對眼,求神拜佛佢哋早啲落車。

 

5) 眼神侵襲

靚女出街,都預咗會畀男人望,只係望一望,再望多望,畀夠三次機會你望夠未,同一車廂下,車程係咁眼望望,全程眼神望實你,都咪話唔自在。你望番佢咩?佢係咁意轉移視線,轉頭又望,頂~唔住喇!

 

6) 病菌侵襲

 

咳咳咳!困在同一個車廂空間,病菌互相走來走去,遇到病人坐隔離,真係慘絕人寰,通常患病嘅人唔帶口罩,帶口罩嘅反而係冇病驚畀人傳染果啲。為人為己,做人有啲公德心好喎!

 

7) 猥瑣侵襲

坐車各有各世界,你打whatsapp、佢煲劇、佢睇新聞,各安天命,點知有啲人追求刺激,硬係要喺車上面睇鹹濕嘢。嚴格嚟講,佢冇直接影響到你,但睇完佢有自然反應,點知會唔會忍唔住架,面斥不雅呀!

 

8) BB侵襲

 

就好似搭飛機咁,見到BB就好似見鬼咁,全程無覺好瞓,非常擔心。BB又好,小朋友又好,你真係唔知佢幾時會嘔奶、瀨尿、瘋狂咁嗌、踢凳、扯頭髮,實在可以騷擾你嘅方式太多,而且你對住小朋友,又點可以控制到佢呢?

 

9) 殷勤老人侵襲

老人家上車,讓座係理所當然,但有時老人坐喺隔離,未必係好事。世界上總係有一種老人家,好鐘意問後生仔女問題,問問下然後話當年,講番咸豐年代果陣嘅事,再加多幾句「不聽老人言,吃虧在眼前」,甚至叫你教佢用手機功能,有時唔係唔想幫,但我朝九晚九真係好攰,畀我抖下得唔得呀?

 

10) 友達以下朋友未滿侵襲

 

友達以上,戀人未滿就聽得多,咁友達以下朋友未滿又係咩?顧名思義,談不上朋友,頂多係好耐無見嘅舊同學舊同事或者疏堂親戚,又或者日日見但做唔到朋友嘅同事,呢啲搵嘢傾但其實一啲唔想傾嘅尷尬時候,真係另類侵襲,苦過Dee Dee!

 

LOAD MORE