職場急救!同事相處間不能犯的錯誤

by 新北由紀

「同事」呢種關係,係人類之間最遙遠的距離……

你哋可以同枱食飯,但暗地傷人;
你哋可以天各一方,但情報互幫;
你哋可以扮Friend,但想對方冇命;
你哋可以扮唔識,但有個WhatsApp group共同抗敵。
 
關係如此奧妙,相處之道自然唔講得少。
記得為自己著想,有些東西不能犯!

1.別當和事佬,有些時間扮路人就好

 
呢個世界係好奇幻嘅,喺工作上要做和事佬,除非你地位高。
壓得住佢兩個,如果唔係就畀人覺得你扮大佬,多管閒事。
 
而且佢哋呢一刻嘈,分分鐘聽日就Friend返,
之後你呢個和事佬,會成為佢哋嘅話題,甚至共同敵人!
 
你可能覺得:「喂!我想和平啫,都咁大代價?」
係㗎,古今中外,為「和平」二字犧牲嘅人,不知堆滿多少個河山啦。
 

2. 不要說「我覺得xxx好啲」,試著說「你都講得啱,但如果xxx,會唔會再好少少?」

 
一嚟就Ban人,對方一定怨恨。
但「先認同,後Ban人」,就截然不同。
 
佢聽得舒服,你勸得輕鬆~
但佢啲嘢真係認同唔落的話!咁點算?
 
簡單啦,照樣先認同,講大話啫,Easy啦。
 

3. (扮)言行一致,(扮)對每個人沒有感情高低之分

 
好簡單,如果A同事問你食唔食Lunch,你話今日買外賣算啦。
但幾分鐘後,B同事問你食唔食Lunch,即使你好想親近B同事,好想去,都要忍痛唔去。
 
因為你言行必需一致,你已經為自己立下「今日買外賣」嘅前設,如果決定不一,
就會傷害A同事,同時畀人覺得你對B同事特別不同。
 
自己內心的高低之分,別讓人知道。
 

4. 可以被慫恿,但不要第一個行動

 
辦公桌內,慫恿有很多,一齊去反老闆、一齊辭職、一齊討厭一個同事。
慫恿,唔係好事;但慫恿,係一種團結。
 
而人類總係喜歡埋堆。
所以,你係可以被慫恿的,
但當要行動時,別做第一人。
 
即係唔好第一個遞信,第一個用言語攻擊人。
歷史話我哋知,
第一個出手的,都不聰明。
史稱「爛頭卒」

5. 別將同事的秘密說出去

 
 
職場上,有人口密,有人口疏。
盡可能,做口密嘅人。
 
都係嗰句,同事之間,今日朋友、聽日敵人、後日又變生死之交,中間變化冇人估唔到。
 
你爆佢秘密時,可能因為佢哋交惡,
但佢哋一旦Friend咗,你嘅惡行就會穿煲,
一次過得罪兩個人。
 
所以,為自己好,應承咗人,就將秘密收於心啦。
LOAD MORE